Arsimi është investimi më i rëndësishëm për të ardhmen e shtetit tonë, të shoqërisë sonë. Është edhe shtylla kryesore për zhvillimin e qëndrueshëm ekonomik e shoqëror të vendit, tha Kryeministri i Republikës së Kosovës, Albin Kurti, në ceremoninë e vënies së gurthemelit të objektit të ri të Fakultetit të Shkencave Matematike-Natyrore, i cili shoqërohej edhe nga Ministrja e Arsimit, Shkencës, Teknologjisë dhe Inovacionit, Arbërie Nagavci.
Duke theksuar se është kënaqësi e veçantë për të që të jetë pjesë e vënies së këtij gurthemeli, kryeministri Kurti tha se matematika dhe shkencat natyrore ofrojnë bazën për zhvillimin e njohurive të reja dhe avancimin e të kuptuarit të botës nga ana jonë.
“Matematika dhe shkencat natyrore kanë ndikim ndër-disiplinor edhe në fusha tjera, dhe kanë rol veçanërisht të rëndësishëm për zhvillimin e inxhinierisë dhe të shkencave teknike. Prandaj, është shumë me rëndësi që objekti i ri i Fakultetit të Shkencave Matematike-Natyrore po ndërtohet mu pranë objektit ekzistues të fakulteteve teknike. Kjo afërsi fizike ndërmjet fakulteteve të shkencave natyrore dhe aplikative do të ofrojë mundësi për bashkëpunim më të ngushtë dhe shkëmbime akademike e shkencore që mund t’i kontribuojnë shumë zhvillimit të ndërsjellë të fushave të STEM që ato mbulojnë”, u shpreh ai.
Në fjalën e tij para të pranishmëve, kryeministri uroi që gurthemeli që po e vejmë sot të jetë edhe një faqe e re në historinë e zhvillimit të Universitetit të Prishtinës, si dhe e zhvillimit të gjithmbarshëm socio-ekonomik të vendit tonë.
Ai tha se e po e bëjmë edhe një hap të rëndësishëm në krijimin e parakushteve për zhvillimin e arsimit dhe të kërkimit në Kosovë. Ndërtimi i objektit të ri modern për Fakultetin e Shkencave Matematike-Natyrore të Universitetit të Prishtinës do t’ju sigurojë studentëve dhe personelit akademik infrastrukturën, teknologjinë dhe burimet e nevojshme për zhvillim akademik dhe profesional në degët studimore të këtij fakulteti.
Falënderim të veçantë pati për Bashkimin Evropian për financimin e këtij projekti përmes fondeve të IPA-s, si dhe UNOPS-in si partner implementues në realizimin e tij. /Kosovatimes/
