Polonia dorëzoi grupin e parë të 14 tankeve gjermane Leopard të premtuara në Ukrainë. Katër automjete janë dorëzuar në vend.
Dërgesat e mbetura te Varshavës po përgatiten sa më shpejt të jetë e mundur. Këtë e bëri të ditur kryeministri i Polonisë Mateusz Morawiecki të premten në Kiev pas negociatave me presidentin e Ukrainës Volodymyr Zelensky.
“Polonia dhe Evropa janë në anën tuaj. Ne patjetër nuk do t’ju lëmë dhe do të mbështesim Ukrainën deri në fitoren e saj të plotë ndaj Rusisë,” theksoi Morawiecki në një konferencë të përbashkët për shtyp me Zelensky.
Më herët të premten, ministri polak i mbrojtjes Mariusz Blaszczak njoftoi dërgimin e Leopardëve të parë në Kiev. Ai tha gjithashtu se ushtarët ukrainas do të trajnohen për të operuar këto tanke në një qendër trajnimi në Swietoszów nën drejtimin e instruktorëve nga Polonia, Kanadaja dhe Norvegjia.
Dëshira e Varshavës për të mbështetur Ukrainën luajti një rol të rëndësishëm në bindjen e aleatëve të tjerë në Evropë për të transferuar pajisje të rënda ushtarake, duke përfshirë tanke, në Ukrainë. Deri kohët e fundit, disa qeveri, përfshirë Berlinin, kishin frikë nga furnizime të tilla për shkak të rrezikut të një përshkallëzimi të luftës, shkruan Reuters .
Morawiecki, ndërsa ishte në Kiev, u bëri thirrje vendeve të BE-së të vendosin sanksionet më të ashpra të mundshme kundër Rusisë. Tani blloku evropian po diskuton paketën e 10-të të sanksioneve. “Sa i përket paketës së 10-të, ne e konsiderojmë atë shumë të butë dhe të dobët dhe po i shtyjmë partnerët tanë që ta bëjnë këtë paketë sa më të gjerë”, tha Morawiecki./kosovatimes/
