Bashkimi Evropian pret që presidenti i Serbisë, Aleksandar Vuçiq dhe kryeministri i Kosovës, Albin Kurti, të pranojnë propozimin evropian për normalizimin e marrëdhënieve pa bisedime të mëtejshme në takimin e tyre të hënën në Bruksel.
– Presim që ta pranojnë propozimin, nuk presim diskutim për përmbajtjen sepse të dy liderët janë njohur me tekstin prej kohësh. Bisedimet do të jenë më shumë rreth zbatimit të atij dokumenti, duke përfshirë afatet kohore, u tha gazetarëve në Bruksel një zyrtar i lartë i BE-së, duke folur përpara takimit të së hënës.
Ai shtoi se edhe Vuçiq edhe Kurti e kanë pranuar marrëveshjen në parim në takimet e shumta me përfaqësuesit e BE-së, Shteteve të Bashkuara të Amerikës, Gjermanisë, Francës dhe Italisë, prandaj presin rezultate konkrete nga takimi i së hënës në Bruksel.
I njëjti burim pret që pjesa më e vështirë e bisedimeve të jetë themelimi i Asociacionit të Komunave me shumicë serbe në Kosovë, diçka që Kurti e kundërshtoi. Por BE thotë se ky detyrim duhet të përmbushet pa kushte.
– Me pranimin e propozimit për marrëveshjen bazë, automatikisht pranohet zbatimi i detyrimit të Asociacionit. Edhe ky është pjesë e propozimit evropian, tha i njëjti burim, duke kujtuar se të gjithë liderët e BE-së e kërkuan atë së bashku me konkluzionet e mbledhjes së Këshillit Evropian.
Ky zyrtar i lartë i BE-së pranoi se ky propozim nuk është ‘marrëveshja gjithëpërfshirëse’ që BE-ja ka synuar, por është ‘maksimumi që është i mundur në rrethana’.
– Shumë thonë se kjo Marrëveshje do të thotë njohje de facto. Ashtu është, marrëveshja do të thotë realisht njohje de facto, tha ai dhe shtoi se BE-ja beson se të gjithë do të përfitojnë nga normalizimi i marrëdhënieve ndërmjet Kosovës dhe Serbisë sepse do të lehtësojë lëvizjen e njerëzve dhe mallrave, do të ofrojë shumë mundësi ekonomike dhe do të ndihmojë në rrugën drejt BE-së dhe Kosovës e Serbisë.
Një burim i lartë nga BE-ja tha se është e qartë se Rusia po përpiqet të bëjë presion ndaj Beogradit që të mos e pranojë këtë marrëveshje, por se BE-ja ka marrë sinjale nga presidenti Vuçiq se mesazhe të tilla nga Rusia nuk kanë ndikuar tek ai.
– Ky propozim ka mbështetjen e fortë të të 27 anëtarëve të BE-së. Rusia, përmes ambasadorit të saj në Beograd, dërgoi mesazhe se tani nuk është koha për atë marrëveshje, se duhet të presë derisa të krijohet një rend i ri botëror. Mesazhet e tilla i shohim si presion ndaj Vuçiqit për të refuzuar propozimin. Mirëpo, nuk shohim se ky presion nga Rusia ka ndikim tek Vuçiq, por vetëm tek një pjesë e opozitës në Serbi, ka thënë ky burim.
