Nën organizimin e “Four Paws” dhe “Fondacioni për të Drejtat e Kafshëve” është mbajtur punëtoria dy ditore për institucionet e nivelit qendror dhe lokal për menaxhimin human dhe të qëndrueshëm të popullsisë së qenve.
Gjatë kësaj punëtorie, kolegët nga “FOUR PAWS” kanë ndarë përvojat e tyre nga puna më shumë se 20-vjeçare në Europën Lindore për menaxhimin e popullsisë së qenve dhe trajtimin e qenve në rrugë.
“Të dhënat “Të dhënat shkencore dhe statistikore të pasqyruara kanë treguar që vrasja e qenve, si masë e reduktimit të numrit të tyre, përveç që nuk është humane, është edhe joefektive, aspak e qëndrueshme dhe ka kosto jashtëzakonisht të madhe”.
Four Paws po ashtu ka demonstruar rastet e suksesshme të reduktimit të qëndrueshëm dhe human të popullsisë së qenve, në disa komuna të Bullgarisë dhe Rumanisë. Metodat humane janë të mundshme dhe e përmirësojnë situatën me qen endacak edhe më shpejtë se sa vrasja apo ndërtimi i strehimoreve për t’i futur të gjithë qentë aty.
Fondacioni për të Drejtat e Kafshëve është shprehur shumë të kënaqur që shumë zyrtarë si nga niveli qendror ashtu edhe nga niveli komunal ishin pjesëmarrës në këtë punëtori.
“Shpresojmë shumë që nga kjo punëtori të marrin përvojat më të mira dhe po ashtu të mësojnë nga gabimet e vendeve tjera, në mënyrë që popullsia e qenve në Kosovë të menaxhohet në mënyrën më efektive të mundshme, gjithmonë duke respektuar mirëqenien e kafshëve. Organizata jonë patjetër që do t’u qëndrojë afër dhe do t’i mbështesë komunat me të gjitha kapacitetet tona për të bërë vlerësimin e popullsisë së qenve endacak dhe për të reduktuar numrin e qenve në rrugë, gjithmonë duke u fokusuar në burimet e shtimit të numrit të qenve në rrugë”, thekson FDK.
Me këtë rast ata falënderuan jashtëzakonisht shumë kolegët nga “FOUR PAWS” që nga agjenda e tyre e ngjeshur, kanë ndarë kohë që të vijnë në Kosovë për të ndarë përvojat e tyre në menaxhimin e popullsisë së qenve.
“Kjo nuk është hera e parë që “FOUR PAWS” angazhohet për kafshët në Kosovë, pasi që tani falë “FOUR PAWS” kemi një storie suksesi si “PYLLI I ARINJVE Prishtina”, që kanë shpëtuar të gjithë arinjtë e restoranteve në Kosovë (dhe së fundmi edhe luanin Gjoni), duke ju ofruar një jetë të dinjitetshme, të përshtatshme për specien e tyre”, thanë FDK. /Kosovatimes/
