Gjermania ka kompensuar pothuajse plotësisht humbjen e furnizimeve me gaz rus falë rritjes së madhe të importeve nga Norvegjia, Holanda dhe Belgjika, pasi Moska ndërpreu furnizimet vitin e kaluar për shkak të mbështetjes perëndimore për Ukrainën.
Midis 2017 dhe fundit të shkurtit 2022, Gjermania importoi mesatarisht 77 teravat orë gaz natyror në muaj, minus eksportet, të cilat përdoreshin për të mbuluar konsumin kombëtar dhe për të mbushur magazinimin, sipas një dokumenti të brendshëm të Agjencisë Federale Gjermane të Gazit.
Në të kundërt, importet neto nga shtatori 2022 deri në fund të janarit, duke përjashtuar dërgesat e gazit rus, ishin 72.7 teravat orë në muaj. Për më tepër, Gjermania importoi rreth 4 teravat orë gaz natyror të lëngshëm (LNG) në janar përmes terminaleve të reja LNG në brigjet gjermane.
Mesatarisht 26 teravat orë gaz natyror në muaj ka mbërritur në Gjermani nga Norvegjia nga viti 2017 deri në fund të shkurtit 2022, sipas dokumentit, dhe pas ndërprerjes së dërgesave ruse, kjo sasi u rrit në 41 teravat orë.
Ndërkohë, importet neto nga Holanda u rritën nga 2 në 25 teravat orë, ndërsa flukset e gazit nga Belgjika u rritën nga rreth 2 teravat orë në rreth 23 teravat orë në muaj mesatarisht që nga shtatori.
Shifrat tregojnë gjithashtu një rënie të konsiderueshme në eksportet gjermane të gazit natyror, për shembull në Zvicër. Agjencia federale vazhdon të vlerësojë furnizimin me gaz të Gjermanisë si “të qëndrueshme”.
