Studentët e Universitetit të Prishtinës që jetojnë në konvikte janë të kënaqur me kushtet që u ofrohen atyre. Se kushtet janë të mira e thonë edhe drejtues të Qendrës së Studentëve, pasi është rritur kërkesa e studentëve për t’u bërë pjesë e kësaj qendre. Por, ata ballafaqohen edhe me sfida të ndryshme.
Me kushtet dhe jetën në konvikte në përgjithësi, studentët e Universitetit të Prishtinës “Hasan Prishtina” janë të kënaqur dhe se çmimi të cilin e paguajnë për muaj është i përballueshëm. Studentët Yll Sallahu dhe Anjeza Osmani, i thanë Radio Kosovës se kushtet të cilat u ofrohen në këtë qendër janë shumë të mira, duke përfshirë edhe aktivitetet e ndryshme që organizohen brenda kësaj qendre.
”Këtu në Qendrën e Studentëve kam filluar këtë vit akademik. Jam shumë e kënaqur me kushtet këtu sepse janë shumë të mira për neve si studentë. Përveç kushteve kemi edhe aktivitete të ndryshme që organizohen nga organizata të ndryshme studentore”, tha Anjeza Osmani.
“Jam shumë i kënaqur se askush nuk mund të t’i ofrojë këto kushte që po na i ofron Qendra Studentore. E kemi edhe bibliotekën që na ofron kushte shumë të mira për mësim”, shtoi Yll Sallahu.
Se kushtet janë të mira e thotë në një përgjigje për Radio Kosovën edhe drejtori i Qendrës së Studenteve, Fatmir Sfishta. Ai tha se kushtet dhe çmimet janë të arsyeshme prandaj ka kërkesë të madhe nga ana e studenteve për t’u bërë pjesë e kësaj qendre dhe se kanë bërë kërkesë për ndërtimin e hapësirave të tjera.
“E gjithë kjo kërkesë për Qendrën e Studenteve neve na jep kurajë që po ofrojmë kushte të mira dhe po është zgjedhja e parë për studentë. Përkundër kësaj, edhe çmimi është i volitshëm. Kapaciteti i përgjithshëm është për 4 mijë shtretër e kërkesa është shumë me madhe se kjo. Mirëpo për momentin, në këtë hapësirë nuk kemi mundësi për ndërtime të reja. Por jemi në negociata ku kemi bërë kërkesë për hapësira të reja”, tha Sfishta.
Ai foli edhe për sfidat më të cilat përballen, e që është mungesa e ujit të ngrohtë për 24 orë.
“Ne deri para tri viteve e kemi pasur problem furnizimin me ujë të ngrohtë higjenik për studentë. Po tash e tri vite e kemi zgjidhur deri diku këtë problem jo në masën 24 por 12 orë ka furnizim më ujë të ngrohtë”, shtoi ai.
Drejtori i Mensës së studentëve, Fahri Osmani, i tha Radio Kosovës se mensa ka kapacitet për ofrimin e ushqimit për 4 mijë studentë dhe se ushqimi i cili ofrohet i plotëson nevojat kalorike që i duhet një studenti.
“Ne kemi kapacitete dhe presim deri në 4 mijë studentë që të ushqehen në mensë. Mensa e studentëve ofron dy shujta në ditë, atë të drekës dhe të darkës. Shujtat janë mjaft të pasura dhe i plotësojnë të gjitha nevojat kalorike të studentëve”, tha Osmani.
Një student për një muaj akomodim paguan 20 euro, ndërsa për ushqim 15 euro. Qendra e Studentëve në Prishtinë ka tetë konvikte me kapacitet për 4 mijë studentë. Kjo qendër financohet nga buxheti i Republikës së Kosovës dhe nga të hyrat vetjake që paguajnë studentët. Buxheti vjetor i Qendrës për vitin 2023, i ndarë nga shteti i Kosovës, është rreth 5.4 milionë euro.
