Kreu i Partisë Demokratike të Kosovës, Memli Krasniqi, ka pritur dy Përfaqësuesit Special të Norvegjisë dhe Sllovenisë për Ballkanin Perëndimor, Arne Sannes dhe Anzej Franges, të shoqëruar nga ambasadorët e të dy shteteve në Republikën e Kosovës.
Në qendër të diskutimit ishte situata aktuale politike në vend dhe propozimin evropian tashmë të pranuar nga Kryeministri Kurti.
Me këtë rast Krasniqi shprehu qëndrimin konsistent dhe të pandryshueshëm në raport me procesin e dialogut.
“Kosova ka pasur nevojë për një marrëveshje finale, gjithëpërfshirëse, ligjërisht dhe ndërkombëtarisht të obligueshme. Fatkeqësisht, kjo marrëveshje jo vetëm që nuk është finale, por parasheh asociacionin në qendër dhe jo njohjen e ndërsjellë – duke zvarritur pafundësisht konfliktin e ngrirë me Serbinë”, tha ai.
Sipas tij, përgjegjësia e plotë bie mbi lidershipin e dobët të Kryeministrit Kurti, i cili, përkundër mbështetjes që i kemi ofruar për dy vjet me radhë në procesin e dialogut dhe në raport me Serbinë, ai ka dështuar që të arrijë përmbushjen e qëllimeve shtetërore të Republikës së Kosovës.
Krasniqi falënderoi Përfaqësuesit Special për Ballkanin Perëndimor të Norvegjisë dhe të Sllovenisë, së bashku me ambasadorët e tyre në Kosovë, për angazhimin dhe mbështetjen e vazhdueshme që shtetet e tyre i kanë ofruar Republikës së Kosovës. /Kosovatimes/
