Shkruan: Naza KRASNIQI
Ka aq promovime mediatike për cilësinë dhe efikasitetin e shërbimeve shëndetësore, për derisa në realitet është e kundërta, ne si qytetarë nuk i shfrytëzojmë ashtu si promovohen, sepse nuk ka mundësi asnjë vizitë, kontroll, analiza apo edhe ultrazë me e përfundua pa pritur në radhë të gjata deri 2 orë apo më shumë dhe pa u maltretu me ato procedura të stërngarkuar nëpër sportele, përveç këtyre nuk funksionojnë disa prej aparaturave dhe obligohesh me u drejtua nëpër ordinanca private, ose duhet me prit për disa analiza dy-tri javë e më shumë, gjithherë duke mos përfshije një pjesë të stafit që janë për lëvdatë.
Mendoj që nëse promovohen shërbime cilësore dhe efikase, nënkupton që i merr të gjitha shërbimet cilësore që i ka të përcaktuara një Qendër e Mjekësisë Familjare apo një Spital dhe shërbime sa më të shpejta. Normale që për një vizitë mundesh me prit një orë, por jo dy ose tri orë dhe kjo ndodh, sepse në spitale apo në Qendrat e Mjekësisë Familjare prej 4 ordinancave punojnë vetëm 2 ose 3, por jo të gjitha dhe normal që bëhen radhët e gjata për vizita apo shërbime të tjera
Po ashtu te Mjekësia familjare në Dardani konkretisht ordinanca për fëmijë nuk punon fare se nuk ka mjek për fëmijë, kështu që fëmijë të vogël, të rritur dhe të moshuar krejt bashkë nëpër korridore….!
Por, të shkruhet për problemet, keqpërdorimet, kushtet, ofrimin e shërbimeve deri të sjelljet e stafit mjekësor, duhet një analizë e tillë, pse dhe si erdhëm deri te kjo gjendje e shëndetësisë, por dua të ndalem te një përvojë dëshpëruese që përjetova unë.
Para disa ditëve te Qendra e Mjekësisë Familjare, me udhëzim të mjekut shkova për të kryer një ultrazë dhe kur shkoj aty shoh radhën e gjatë të pacientëve, të cilët edhe ata si unë e kërkonin shërbimin e njëjtë, pastaj e pyeta një motër se kam udhëzimin e mjekut për ta kryer këtë shërbim, ajo mu përgjigj se duhet të pritni radhën, se edhe këta janë duke pritur për me bë termin, ok u obligova me prit edhe pse nuk mundesha me marrë me mend që për të bërë termin duhet me prit së paku 2 orë. Pas dy ore pritje u paraqita në sportel aty motra me cakton termin me 08.03 2023 në ora 07:00, këtu fillova me mendu që në ora 07:00 ata fillojnë punën dhe deri sa të startojnë me palë 07:15, llogarita që unë me termin shërbimin e kryej në ora 08:00, por fatkeqësisht nuk rezultojë ashtu siç mendova unë. Në ditën kur shkova edhe pse isha me termin prapë u detyrova me prit në radhën e gjatë që kishte dal jashtë objektit, pati edhe reagime dhe shqetësime se kjo nuk është në rregull dhe ky është maltretim për qytetarë, po një prej motrave na përgjigjet që nuk kemi staf të mjaftueshëm dhe filluan me u shpejtua pasi që erdhi një motër tjetër dhe vërejtën shqetësimet e pacientëve.
Por ajo se çfarë më habit dhe nuk më duket në rregull se gjatë komunikimit me pacientë që ishim duke pritur e kuptuam se të gjithë kishim pasur termin në ora 07:00 të mëngjesit, gjë që me të vërtet më bëri të dëshpërohem shumë se përveç kushteve dhe shërbimeve të dobëta, pritjeve të gjata aty mungon edhe serioziteti i punës dhe trajtimi adekuat i pacientëve. Si është e mundur që të gjithë kishim orën e njëjtë për termin?
Rasti përafërsisht i njëjtë ishte edhe në njërën prej spitaleve ku prej 4 ordinancave vetëm njëra punonte të tjerat ishin të mbyllura, sepse mjekët nuk ishin aty, po ashtu pati reagime dhe shqetësime etj
Në rastet të tilla kur qytetari maltretohet nëpër radhë të gjata dhe atë për një termin duhet me prit deri 1 muaj nuk kanë zgjidhje tjera vetëm duhet me iu drejtua ordinancave private apo nëpër vende tjera.
Promovimi mediatik është i ekzagjeruar tepër, sepse pacientët nuk i gëzojnë ato shërbime as në që Qendrat e Mjekësisë Familjare, e as në spitale nuk është gjendja më e mirë, që mund të them është më katastrofë.
Si është e mundur që krejt pacientët me pas të njëjtën orë termini?
A është vlerësuar gjendja në teren si dhe në çfarë mënyre i ofrojnë ato shërbime?
Andaj gjendja në shëndetësinë kosovare nuk është aspak e mirë dhe shpresojmë që një ditë të bëhet mirë edhe në shëndetësinë kosovare, por mirë do të bëhet kur do të sanksionohen të gjithë ata që nuk zbatojnë përgjegjësit e veta dhe ata që keqpërdorin taksat e qytetarëve dhe donacionet për shëndetësi …!
