Në një përplasje mes dy makinave në një rrugë ndërshtetërore në Tennessee të SHBA-së, gjashtë vajza kanë humbur jetën dhe dy persona janë plagosur, njoftuan shërbimet lokale.
Siç raporton CNN, aksidenti ka ndodhur herët në mëngjesin e së dielës sipas kohës lokale.
Në vendin e aksidentit janë gjetur të vdekura gjashtë vajza, sipas informacioneve fillestare të moshave 1 deri në 18 vjeç. Të gjithë kanë qenë pranë mjetit të përmbysur, nga i cili me siguri kanë rënë jashtë nga forca e goditjes.
Një grua, e cila besohet se ka rënë gjithashtu nga e njëjta makinë, është gjetur në gjendje kritike.
Ajo u trajtua në vendngjarje përpara se të transportohej me helikopter në një spital lokal, thanë zyrtarët.
Një tjetër person ka mbetur i plagosur dhe është transportuar në spital.
Drejtuesi i veturës tjetër të përfshirë në aksident nuk ka pësuar lëndime.
Viktimat ende nuk janë identifikuar dhe nuk dihet nëse ata kanë lidhje. Ende nuk është bërë i ditur shkaku i aksidentit.
Hetimi është në vazhdim.
