Kryetari i Aleancës për Ardhmërinë e Kosovës (AAK) Ramush Haradinaj, përmes një postimi në Facebook ka kujtuar ngjarje të rëndësishme, që siç tha ai, e kanë sjellë lirinë e Atdheut.
Ai ka shkruar se muaji mars shënon shumë ngjarje të rëndësishme nga koha e luftës në Kosovë.
Haradinaj kujtoi 29 marsin e vitit 1999, përkatësisht martirizimin e dhjetëra motrave dhe vëllezërve tanë në fshatrat Beleg e Irzniq të Deçanit dhe në Poterq të Klinës.
Ngjarje tjetër e rëndësishme, sipas tij, në këtë kohë ishte rënia heroike e katërmbëdhjetë bashkëluftëtarëve nga Zona e Dukagjinit, Pashtrikut e Drenicës, në përballje heroike me armikun në Shishman të Bokës.
“29 marsi na kthen në kujtesë vitin 1999, martirizimin e dhjetëra motrave dhe vëllezërve tanë në fshatrat Beleg e Irzniq të Deçanit dhe në Poterq të Klinës. Edhe pse të paarmatosur, ata nuk u kursyen nga barbarët dhe vazhdojnë të mbesin plagë që kullon në shpirtin tonë”, shkruan Haradinaj.
Ai po ashtu ka kujtuar rënien heroike të katërmbëdhjetë bashkëluftëtarëve nga Zona e Dukagjinit, Pashtrikut e Drenicës, në përballje heroike me armikun në Shishman të Bokës.
“Sakrifica e tyre dhe e të gjithë dëshmorëve dhe martirëve të Lirisë na jep motivim për ta dashur dhe mbrojtur Atdheun tonë dhe të vazhdojmë angazhimin si shoqëri dhe shtet për zbardhjen e fatit të të pagjeturve dhe vendosjen e drejtësisë për ta. Lavdi e përjetshme të rënëve për liri”, ka shkruar Haradinaj në Facebook.
