Shërbimi Finlandez i Sigurisë (SUPO) i ka dhënë një goditje rrjetit të inteligjencës ruse. Operacionet e spiunazhit të Rusisë në Finlandë janë reduktuar ndjeshëm gjatë vitit të kaluar falë ndalimit të vizave dhe dëbimit të oficerëve të inteligjencës ruse, raportoi departamenti. Lajmi bëhet i ditur nga ABC News.
Agjencia arriti të mbyllë punën e shërbimeve të inteligjencës ruse në Finlandë vitin e kaluar, raportoi SUPO.
“Baza e inteligjencës ruse (në Finlandë) është zvogëluar në rreth gjysmën e madhësisë së saj të mëparshme vitin e kaluar”, tha drejtori i SUPO, Antti Pelttari. Sipas tij, arsyeja e uljes është dëbimi i të dyshuarve për spiunazh dhe refuzimi i dhënies së vizave për rusët.
Raporti i SUPO vë në dukje se Rusia tradicionalisht ka kryer operacione të inteligjencës në Finlandë nën mbulim diplomatik. Në vitin 2022, Moska është fokusuar në spiunazhin kibernetik për të kompensuar mungesën e inteligjencës së fshehtë.
“Megjithëse Rusia ende po përpiqet të vendosë oficerët e inteligjencës nën mbulesë diplomatike, ajo duhet të kompensojë mungesën e agjentëve, për shembull, duke përdorur gjithnjë e më shumë formate të tjera të operacioneve të fshehta jashtë vendit”, tha Pelttari.
Gjatësia e kufirit finlandez me Rusinë është 1340 kilometra. Pas luftës së nisur nga Moska në Ukrainë, Helsinki po përpiqet në çdo mënyrë të mundshme të mbrohet nga fqinji i tij.
Kështu, në shkurt, Finlanda filloi të ndërtojë një pjesë testuese të gardhit në kufirin me Rusinë. Një pjesë prej tre kilometrash gardhe duhet të ngrihet deri në qershor. Aty pranë do të ndërtohet edhe një rrugë për patrullimet kufitare, ndërsa në zonat më të rëndësishme do të vendoset ndriçimi dhe altoparlantët.
Kjo është vetëm faza fillestare, gjatësia e të gjithë gardhit do të jetë së paku 200 kilometra. Ndërtimi i tij mund të zgjasë 3-4 vjet, kostoja e projektit do të jetë afërsisht 143 milionë dollarë, shkruan Reuters. Sipas agjencisë , Finlanda gjithashtu planifikon të ndërtojë fortifikime shtesë në kufirin me Rusinë: gropa dhe bunkerë.
Përveç kësaj, Finlanda aplikoi për anëtarësim në NATO vitin e kaluar. Të gjithë anëtarët e aleancës kanë rënë dakord tashmë për hyrjen e vendit skandinav në bllokun mbrojtës. Mbetet që anëtarët e NATO-s ta ratifikojnë këtë vendim. I vetmi vend që nuk e ka bërë këtë është Turqia.
Megjithatë, presidenti Rexhep Tajip Erdogan tha se vendi është gati të miratojë hyrjen e Finlandës në NATO. Ai shprehu shpresën se Parlamenti do ta miratojë kërkesën e saj përpara zgjedhjeve të majit në Turqi. “Jam i sigurt se Finlanda në radhët e NATO-s do të japë një kontribut të rëndësishëm për sigurinë dhe stabilitetin global”, tha Erdogan./Kosovatimes/
