35 trupa janë gjetur në një pus brenda një tempulli hindu në Indinë qendrore, në të cilin dhjetëra njerëz ranë kur një pjesë e strukturës u shemb, njoftuan zyrtarët sot.
Pamjet e incidentit të djeshëm kur një pjesë që mbulonte një pus u shemb në një kompleks tempulli në Indore në shtetin Indian të Madhya Pradesh tregojnë njerëz që nxitojnë në mënyrë kaotike drejt daljes.
Gati 140 shpëtues, duke përfshirë një pjesëtar të ushtrisë, përdorën litarë dhe shkallë për të nxjerrë trupat nga pusi ndërsa uji u pompua. Kalimi i ngushtë dhe mbeturinat e mprehta në pus ua vështirësuan punën.
Sipas dëshmitarëve okularë, shumë besimtarë erdhën në tempull për një ritual zjarri në festimin e festës së Zotit Ram.
Dhjetra njerëz ranë në pus kur struktura e çatisë mbi të u shemb dhe disa pjesë ranë në ujë, tha Komisioneri i Policisë Makrand Deoskar.
Një dëshmitar okular u tha gazetarëve se autoritetet reaguan ngadalë dhe se ambulanca e parë mbërriti një orë pas thirrjes.
Struktura e çatisë me sa duket u shemb sepse nuk mund të përballonte peshën e numrit të madh të njerëzve, tha zyrtari shtetëror Shivraj Singh Chauhan dhe urdhëroi një hetim.
“Deri më tani kemi nxjerrë 35 trupa dhe operacioni i shpëtimit po vazhdon”, tha një zyrtar tjetër.
Times of India raportoi se operacionet e shpëtimit u zgjeruan kur kamerat nënujore treguan trupa që notonin në një pus me baltë.
16 personat e lënduar nga ky incident ndodhen në spitale.
Stafi i tempullit ndaloi së përdoruri pusin vite më parë dhe siguroi hyrjen duke instaluar shufra hekuri dhe pengesa të tjera.
