Fondi Monetar Ndërkombëtar (FMN) njoftoi të premten se Bordi i Drejtorëve miratoi një këst katërvjeçar për Ukrainën në shumën prej 15.6 miliardë dollarësh. Kësti është pjesë e një pakete ndërkombëtare më të madhe prej 115 miliardë dollarësh, raporton Reuters . Fondet e akorduara duhet të plotësojnë nevojat urgjente të Ukrainës, e cila ka më shumë se një vit që mbrohet nga një pushtim rus në shkallë të gjerë.
Vendimi i FMN-së hap mundësinë e transferimit të menjëhershëm të 2.7 miliardë dollarëve në dispozicion të Kievit, tha shërbimi për shtyp i FMN-së.
Mbështetja financiare e dhënë Ukrainës është rasti i parë i ndihmës urgjente nga Fondi Monetar Ndërkombëtar për një shtet ndërluftues.
“Pushtimi rus i Ukrainës ka një ndikim shkatërrues në ekonominë dhe shoqërinë e saj”, tha Gita Gopinath, Zëvendës Drejtoresha e Parë Menaxhuese e FMN-së. Pavarësisht kësaj, qeveria ukrainase ka qenë në gjendje të ruajë stabilitetin e përgjithshëm makroekonomik dhe financiar falë politikave të aftë dhe ndihmës së konsiderueshme të huaj, tha Gopinath.
Një marrëveshje formale e FMN-së për ofrimin e ndihmës për Ukrainën u miratua më 21 mars nga përfaqësuesit e Fondit dhe qeverisë ukrainase, duke marrë parasysh përparimin e Ukrainës drejt anëtarësimit në Bashkimin Evropian pas përfundimit të luftës, raporton Reuters .
