Misioni britanik bllokoi transmetimin e një takimi jozyrtar të Këshillit të Sigurimit të OKB-së, organizuar nga Rusia “për çështjen e fëmijëve të evakuuar nga Ukraina”. Kjo është bërë e ditur në Twitter nga delegacioni britanik.
Në këtë takim do të flasë Maria Lvova-Belova, Komisionerja për të Drejtat e Fëmijëve pranë Presidentit të Federatës Ruse, urdhërarresti i së cilës është lëshuar nga Gjykata Penale Ndërkombëtare në muajin mars. Lvova-Belova, ashtu si presidenti rus Vladimir Putin, dyshohet për deportimin e paligjshëm të fëmijëve nga territoret e okupuara të Ukrainës në Rusi.
Përfaqësuesit e Mbretërisë së Bashkuar bllokuan transmetimin e takimit në burimin zyrtar të OKB-së për të parandaluar Lvova-Belova nga “përhapja e dezinformatave”. “Nëse Maria Lvova-Belova dëshiron të flasë për veprimet e saj, ajo mund ta bëjë atë në Hagë,” tha delegacioni.
Rusia do të mbajë një takim jozyrtar të Këshillit të Sigurimit më 5 prill me temën e shpallur si “Fëmijët dhe konfliktet e armatosura: kriza ukrainase. Evakuimi i fëmijëve nga zona e konfliktit”.
Zëvendës Përfaqësuesi i Parë i Përhershëm i Federatës Ruse në OKB Dmitry Polyansky tha se diplomatët rusë “do të gjejnë një mënyrë për të transmetuar”. Ai ka sqaruar se transmetimi do të bëhet në kanalin e tij telegram.
Më 1 prill, Rusia mori të drejtën e kryesimit të Këshillit të Sigurimit të OKB-së për një muaj . Ministria e Jashtme e Ukrainës e quajti presidencën ruse një shaka të keqe, Bashkimi Evropian tha më 1 prill se ishte “e përshtatshme për ditën e 1 prillit”./Kosovatimes/
