Gjatë dy ditëve të kësaj fundjave do të ndërpritet për qarkullim një pjesë e rrugës “Agim Ramadani” në kryeqytet për shkak të punimeve në zgjerimin e rrjetit të ngrohjes nga ‘Termokosi’.
Qarkullimi i automjeteve do të ndërpritet në segmentin nga “Shtëpia e Sporteve” deri te ndërtesa e Kuvendit të Kosovës.
Sipas “Termokosit” ndërprerja e qarkullimit në këtë rrugë ka qenë e domosdoshme për të mundësuar kyçjen në gypin kryesor të ngrohjes për 62 objekte banesore me 767 njësi banimi në lagjen në afërsi të parkut të qytetit si dhe pjesës së qytetit të vjetër tek rruga “Bajram Kelmendi”.
Si rrjedhojë e këtyre punimeve “Trafiku Urban” ka bërë të ditur se do të ndryshohet edhe qarkullimi i autobusëve urbanë. Kësisoj, autobusët e linjës nr. 1, në shkuarje dhe ardhje do të qarkullojnë në rrugën “Eqrem Çabej”, ndërsa autobusët e linjës nr. 3C, në shkuarje dhe ardhje do të qarkullojnë në rrugën ““Eqrem Çabej” për të vazhduar në bulevardin “Xhorxh Bush”, rrugën “Garibaldi” dhe “Luan Haradinaj”. /Kosovatimes/
