Një 32-vjeçar u arrestua të dielën me dyshimin se theri me thikë një imam në një xhami në Nju Xhersi, tha në një deklaratë Zyra e Prokurorit të Qarkut Passaic.
Sherif Zorba u arrestua pasi dyshohet se theri me thikë imam Sayed Elnakib të Xhamisë Omar në Paterson, New Jersey. Elnaqib, i cili është në gjendje të qëndrueshme, u godit me thikë gjatë namazit të Sabahut në orën 5:30 të mëngjesit, lutjes së parë ditore, ndërsa besimtarët ishin në sexhde, tha për CNN zëdhënësi i xhamisë Abdul Hamdan.
Një video nga kamerat e vëzhgimit tregon një grup besimtarësh në xhami të rregulluar në pesë rreshta të gjata (safs). Ndërsa adhuruesit po bënin sexhde, një person i veshur me xhup nga rreshti i tretë i kaloi adhuruesit dhe erdhi te imami, të cilin më pas e sulmoi.
Xhemati reagoi menjëherë dhe sulmuesi u përpoq të çante turmën për të shpëtuar nga xhamia.
Sherif Zorba akuzohet për tentativë vrasjeje të shkallës së parë, armëmbajtje të shkallës së tretë për qëllime të paligjshme dhe armëmbajtje pa leje të shkallës së katërt, sipas një deklarate nga Zyra e Prokurorit të Qarkut të Passaic. Ai sot do të dalë para Gjykatës Qendrore të Procedurës Gjyqësore, shtoi Prokuroria.
Bulent Can, një ndihmës prokuror i lartë, tha për CNN se janë ende duke hetuar motivin. Nëse Zorba shpallet fajtor, ai përballet me një dënim maksimal deri në 26 vjet burg.
