Autoritetet iraniane do të fillojnë të përdorin video survejimin për të gjetur dhe ndëshkuar gratë që shkelin kodet e veshjes myslimane. Këtë e ka bërë të ditur policia , shkruan The Guardian.
“Kamera inteligjente” do të instalohen në vende publike dhe në rrugë në të gjithë vendin për të ndihmuar në identifikimin e shkelësve të rregullave. Policia do të dërgojë paralajmërime dhe dëshmi për shkelje të ligjit të hixhabit për gratë që nuk respektojnë rregullat. Gratë që shkelin ligjin e hixhabit fillimisht do të paralajmërohen dhe më pas do të dërgohen në gjykatë. Pronarëve të makinave do t’u dërgohen paralajmërime për shkelje nga pasagjerët. Shkelja e përsëritur e ligjit mund të rezultojë në konfiskimin e automjetit.
Mbajtja e detyrueshme e shamisë për gratë në vende publike u parashikua në ligj menjëherë pas Revolucionit Islamik të vitit 1979.
Numri i grave në Iran që shkelin kodin e veshjes është rritur pas një vale protestash për vdekjen e një vajze kurdo-iraniane, Mahsa Amini, e cila u akuzua për shkelje të rregullave të hixhabit. Forcat e sigurisë thanë se vajza vdiq nga një atak në zemër. Megjithatë, sipas dëshmitarëve okularë, ajo është rrahur gjatë ndalimit, pas së cilës ka rënë në koma. Protestat që shpërthyen ishin më të mëdhatë që nga revolucioni i vitit 1979 – ato u përhapën në 160 qytete në të 31 provincat e vendit.
Sipas organizatës për të drejtat e njeriut HRANA, deri më 20 shkurt, 530 aktivistë u vranë gjatë demonstratave, duke përfshirë 71 të mitur dhe 70 zyrtarë të sigurisë. Më shumë se 19,700 njerëz janë arrestuar, duke përfshirë 181 adoleshentë. Katër protestues u ekzekutuan publikisht dhe 105 demonstrues u përballën me dënime me vdekje.
Shefi i zbatimit të ligjit iranian Ahmad-Reza Radan tha se pajisjet e reja për të zbuluar shkelësit e ligjit të hixhabit do të vihen në funksion “nga e shtuna e ardhshme”. Në deklaratat e policisë thuhet se “çdo veprim individual apo kolektiv në kundërshtim me ligjin nuk do të mbetet pa përgjigje”. Në fund të marsit, kreu i gjyqësorit, Gholam-Hossein Mohseni-Ezhei, tha se “heqja e hixhabit do të thotë armiqësi ndaj vlerave dhe njerëzve dhe ata që kryejnë një akt kaq të pazakontë do të dënohen”.
