Miliarderi Elon Musk ka regjistruar një kompani të inteligjencës artificiale në Nevada, sipas The Wall Street Journal, duke cituar dokumente.
Kompania quhet X.AI. Musk renditet si drejtori i vetëm i saj, ndërsa shefi financiar, Jared Birchall, renditet si sekretar i kompanisë.
Emri i startup-it përkon me një tjetër markë në pronësi të Musk – X Corp., vë në dukje gazeta. Kohët e fundit u bë e ditur se kompania mëmë e Twitter pushoi së ekzistuari pas një bashkimi me X Corp. Sipas gazetës, regjistrimi i kompanisë së re është pjesë e planit të Musk për të nisur një super aplikacion “për gjithçka” bazuar në Twitter.
Gjatë muajve të fundit, biznesmeni ka punësuar një ekip për të ndërtuar një startup inteligjence artificiale për të konkurruar me OpenAI , kompaninë që zhvilloi Chat GPT , një chatbot , sipas burimeve të The Wall Street Journal . Këtë e ka raportuar edhe Financial Times.
Kështu, sipas raportimeve të mediave, Musk arriti të punësojë Igor Babushkin, një shkencëtar nga laboratori DeepMind AI, në pronësi të Alphabet Corporation. Ai gjithashtu ftoi punonjësit e OpenAI për të punuar, por nuk arriti t’i joshte ata.
