Presidenti rus Vladimir Putin mori pjesë në një meshë të Pashkëve të dielën e mbajtur nga Kisha Ortodokse Ruse, e cila mbështeti fuqishëm vendimin e Kremlinit vitin e kaluar për të sulmuar Ukrainën, raporton “Reuters”.
Putin, i veshur me një kostum të errët me një këmishë të bardhë dhe një kravatë ngjyrë vjollce të errët, mori pjesë në shërbimin në një cep të Katedrales së Krishtit Shpëtimtar të Moskës, duke mbajtur një qiri të kuq të ndezur dhe u shfaq në një transmetim të drejtpërdrejtë të shërbimit të mesnatës.
Kur Patriarku Kirill tha “Krishti u ringjall”, Putin iu bashkua pjesëmarresve të tjerë duke iu përgjigjur “Ai u ringjall me të vërtetë”, që ishte fjalimi i tij i vetëm gjatë qëndrimit të tij në kishë.
Megjithatë, në prag të këtij shërbimi të Pashkëve, ku mori pjesë edhe Putini, në Ukrainë, forcat ruse nën kontrollin e tij vazhduan të shkatërronin gjithçka brenda rrezes së artilerisë së tyre. Kështu, gjatë natës, ushtria ruse bombardoi një kishë në rajonin ukrainas të Zaporozhye.
Fotot tronditëse tregojnë se kisha është kthyer në gërmadha dhe një vrimë e zezë në tokë. Ukrainasit shkuan në Twitter për të ndarë tmerrin e tyre nga bombardimi i një kishe në fshatin Komishvaha në rajonin e Zaporozhye.
Deputeti ukrainas Oleksiy Goncharenko shkroi: “Natën e Pashkëve, rusët shkatërruan një kishë pranë Zaporozhye. Dhe ata i quajnë ukrainasit nazistë dhe satanistë”.
Një tjetër komentoi: “Rusia feston Pashkët Ortodokse brenda natës duke bombarduar një kishë në periferi të qytetit tim të lindjes, Zaporozhye.”
Zyrtari ukrainas Anton Gerashchenko tha se kisha ishte bosh dhe askush nuk u lëndua. Gjithashtu u raportua se Rusia sulmoi Snihurivka, në zonën e Nikolaev, dhe vrau dy adoleshentë.
