Kanali i telegramit Donbass Devushka, përmes të cilit shpërndaheshin dokumente sekrete të Pentagonit dhe inteligjencës, drejtohej nga Sarah Beals, një ish-ushtare e marinës amerikane, shkruan The Wall Street Journal.
Beals i tha botimit më 15 prill se ajo është administratorja e Donbass Devushka dhe një nga 15 personat “në mbarë botën” që e mbajnë kanalin në funksion. Ajo nuk pranoi të përmendte këta njerëz.
Beals, 37, e cila shërbeu deri në fund të vitit 2022 në Stacionin Ajror Detar të SHBA në ishullin Whidbey, siguron se nuk ishte ajo që postoi dokumentet sekrete. Wall Street Journal thekson se nuk ka asnjë provë që Beals zbuloi ndonjë informacion në të cilin ajo kishte akses gjatë shërbimit.
Rrjedhja e dhjetëra dokumenteve të fshehta të inteligjencës dhe mbrojtjes amerikane që ndër të tjera lidhen me luftën në Ukrainë, u bë e njohur në prill. Disa nga këto dokumente u publikuan fillimisht në kanalin telegram “pro-rus” Donbass Devushka.
Më 13 prill , Jack Teixeira, një oficer 21-vjeçar i Forcave Ajrore të SHBA, u arrestua me dyshimin për rrjedhje dokumentesh . Miqtë e të arrestuarit thanë se ai kishte ndarë dokumente sekrete që nga fillimi i pushtimit të plotë të Ukrainës nga Rusia.