Kryeministri i Republikës së Kosovës, Albin Kurti, gjatë vizitës së sotme në Agjencinë Kadastrale të Kosovës, e ku marrë pjesë edhe në ceremoninë e vendosjes së gurthemelit të objektit të ri të kësaj agjencie, ka premtuar përkrahje të vazhdueshme për këtë institucion.
“Përkrahja e qeverisë për këtë institucion nuk do të mungojë. Ndryshime po bëhen në shumë pjesë të administratës shtetërore. Për 20 vite janë investuar rreth 20 milionë euro në këtë agjenci. Vetëm deri në gjysmën e mandatit tonë po investohen 16 milionë euro. Digjitalizimi ka përshpejtuar punën. Tani qytetarët mund të tërheqin dokumentin në platformën ‘e-Kosova’”, ka theksuar Kurti.
Ai bëri me dije se pritet të kemi një aerofotografim së shpejti. “Agjencia luan rol kyç në projekte të shumta infrastrukturore. Jemi të vetëdijshëm që kadastri është pasqyra e një vendi. Shpronësimet shpeshherë janë keqpërdorur. E përgëzoj ministrin Aliu që brenda 2 vitesh kemi paguar 75 euro borxh nga shpronësimet.
Objekti do të kushtojë, 2.1 milionë euro dhe ka 4 mijë metra katror, raporton RTKlive.
Kurse ministri Liburn Aliu, ka uruar që projekti që do ta vendosin gurthemelim të shërbejë në fushën e kadastrit.
“Rindërtimi i tij nuk është çështje e lehtë, jemi të vendosur të kemi një kadastër që ta lehtësojë punën. Problemet me kadastër janë pengesë në zhvillimin e vendit. Pronarët e pronave mund ti marrin certifikatat online e çështjet me adresa do t’i kryejmë shpejte. Aerofotografimi do të hapë mundësi që të kemi projekte të tjera”, tha ai.
