Policia e Kosovës në një komunikatë për media ka thënë se i ka ndërmarrë veprime dhe masa për të garantuar sigurinë dhe mbarëvajtjen e procesit zgjedhor në komunat veriore të Kosovës.
Policia ka bërë të ditur se synon të krijojë një ambient të sigurt dhe të qetë për të gjithë qytetarët, për të garantuar të drejtën e votës dhe ndërmarrjen e masave ligjore ndaj veprimeve të kundërligjshme.
Sipas komunikatës se policisë së Kosovës qëllimi i këtyre planifikimeve dhe koordinimeve është parandalimi i dukurive negative dhe aktiviteteve kriminale që në çfarëdo mase do të rrezikonin sigurinë, qetësinë dhe stabilitetin në katër komunat veriore të Kosovës.
Më poshtë mund ta lexoni komunikatën e plotë nga Policia e Kosovës:
Planifikimet dhe angazhimet policore në menaxhimin e sigurisë gjatë procesit zgjedhor në komunat veriore të Kosovës
Prishtinë, më 21 prill 2023
Policia e Kosovës bazuar në planifikimet e saj operacionale dhe në bashkërendim me përfaqësues të institucioneve kompetente, përfshirë Komisionin Qendror Zgjedhor (KQZ), ka ndërmarr të gjitha veprimet dhe masat në kuadër të mandatit dhe autorizimeve ligjore për koordinimin e aktiviteteve, me qëllim të ofrimit të sigurisë dhe mbarëvajtjes së procesit zgjedhor në komunat veriore të Kosovës.
Qëllimi i këtyre planifikimeve dhe koordinimeve është implementimi i planit operativ policor, ku Policia e Kosovës synon krijimin e një ambienti të sigurt dhe të qetë për të gjithë qytetarët e Republikës së Kosovës: para, gjatë dhe pas procesit të zgjedhjeve.
Garantimi i së drejtës së votës, mbrojtja e jetës dhe pronës, parandalimi i dukurive negative dhe aktiviteteve kriminale që në çfarëdo mase do të rrezikonin sigurinë, qetësinë dhe stabilitetin, si dhe ndërmarrja e masave ligjore ndaj veprimeve të kundërligjshme etj.
Ky plan parasheh që Policia e Kosovës të angazhohet në realizimin e detyrave dhe përgjegjësive ligjore në mënyrë profesionale, transparente dhe të paanshme për qytetarët dhe vendin, për t’u mundësuar ushtrimin e lirë të së drejtës së votës të gjithë pjesëmarrësve në zgjedhje.
Njëkohësisht, institucionet relevante inkurajojnë të gjithë qytetarët që të bashkëpunojnë me Policinë e Kosovës, Prokurorinë e Shtetit, KQZ-në dhe, të raportojnë për çdo rast të kundërligjshëm që ndërlidhet me sigurinë, me procesin zgjedhor apo edhe jashtë tyre.
Raportimet do të trajtohen në mënyrë konfidenciale dhe të njëjtat mund t’i adresoni te Prokuroria e Shtetit, KQZ-ja dhe te Policia e Kosovës. /Kosovatimes/
