Greqia nuk ka ndërmend ta njohë pavarësinë e Kosovës, edhe pse javën e kaluar abstenoi gjatë votimit për pranimin e saj në Këshillin e Evropës, tha dje këshilltari i kryeministrit grek për sigurinë kombëtare, Thanos Dokos, në Forumin Delphi në Greqi.
Shumë u habitën që Greqia abstenoi, një nga pesë vendet e BE-së që nuk e njohin pavarësinë e Kosovës, transmeton agjencia Hina.
Dokos shtoi se Serbia në kuadër të marrëveshjes për normalizimin e marrëdhënieve ka premtuar se nuk do të bllokojë anëtarësimin e Kosovës në organizatat ndërkombëtare dhe se Athina i është referuar kësaj gjatë votimit në Këshillin e Evropës.
“Ne ende nuk e kemi njohur Kosovën dhe as nuk do ta bëjmë këtë”. Mundohemi të jemi sa më konstruktivë”, tha Dokos.
Këshilli i Evropës miratoi vendimin për pranimin e Kosovës një javë para raundit të ri të negociatave mes presidentit serb Aleksandar Vuçiq dhe kryeministrit të Kosovës Aljbin Kurti në Bruksel, transmeton Hina. Takimi i planifikuar për 2 maj është veçanërisht i rëndësishëm sepse në të do të prezantohet draft statusi i komunave në veri të Kosovës me shumicë serbe, i cili prej muajsh është pengesë në normalizimin e marrëdhënieve.
Hina kujton se ministri i Jashtëm i Serbisë, Ivica Daçiq, ka deklaruar se është i zhgënjyer me qëndrimin e Greqisë dhe këtë ia ka përcjellë qeverisë së kryeministrit Kyriakos Mitsotakis, i cili pritet të mbajë zgjedhjet parlamentare më 21 maj.
“Shpresoj që miqtë tanë serbë të kujtojnë se ne i kemi përkrahur në këtë me vite të tëra”, tha Dokos.
Greqia mbështet zgjerimin e Bashkimit Evropian (BE) në vendet kandidate juglindore – Serbinë, Bosnjë dhe Hercegovinën, Malin e Zi dhe Maqedoninë e Veriut – dhe nuk e kundërshtoi vendimin që banorët e Kosovës me pasaportat e tyre të mund të udhëtojnë pa viza në BE.
“Ne kemi një mjedis të vështirë nga të gjitha anët, prandaj është e rëndësishme për ne që të përfundojmë procesin e zgjerimit ose të paktën të ruajmë frymën e takimit të Selanikut nga 20 vjet më parë”, tha Dokos.
Greqia prej vitesh ka pasur marrëdhënie të acaruara me Turqinë fqinje për shkak të mosmarrëveshjes kufitare dhe Qipros së ndarë, dhe kjo është edhe arsyeja e mos thirrjes së saj ndaj Kosovës.
