Një person i armatosur ka vrarë pesë persona, përfshirë një fëmijë në një shtëpi në Teksas.
Policia në Teksas thotë se ata besojnë se një burrë vrau pesë nga fqinjët e tij pas një debati, me një armë gjysmë automatike.
Viktimat ishin të gjithë nga Hondurasi, përfshire një fëmijë tetë vjeçar.
Të shtënat ndodhën të premten në mbrëmje në qytetin e vogël të Cleveland, San Jacinto County, në veri të Hjustonit.
Në mesin e të vrarëve ishin dy gra që u gjetën të shtrira mbi dy fëmijë të mbijetuar, sipas sherifit lokal Greg Capers.
“Për mendimin tim, ata në fakt po përpiqeshin të kujdeseshin për foshnjat që t’i mbanin gjallë,” ka thënë Sherifi Capers për stacionin lokal KTRK. Ai shtoi se të gjitha viktimat ishin qëlluar “nga qafa lart, pothuajse në stilin e ekzekutimit, kryesisht në kokë”.
I dyshuari, që besohet të jetë meksikan, është Francisco Oropez, 38 vjeç. Ai është ende në arrati dhe mendohet se është i armatosur. Ai akuzohet për pesë vrasje.
Policia po përdor qen dhe një dron në gjueti për të dyshuarin, i cili besohet se fshihet në një pyll aty pranë.
Hetuesit besojnë se viktimat i kishin kërkuar Oropez, i cili mendohet se kishte qenë duke pirë, të ndalonte të shtënat teksa po përpiqeshin të flinin.
Gjithsej 10 persona ndodheshin në pronë në atë moment. Të rriturit u deklaruan të vdekur në vendngjarje, ndërsa tetëvjeçari ndërroi jetë në spital.
Personi i armatosur besohet të ketë përdorur një pushkë gjysmë automatike AR-15.
Dy javë më parë, katër të rinj u qëlluan për vdekje gjatë një festë të ditëlindjes së 16-të në Alabama.
Incidentet me armë zjarri janë shkaku kryesor i vdekjeve për fëmijët dhe adoleshentët amerikanë, sipas Qendrave të ShBA për Kontrollin dhe Parandalimin e Sëmundjeve.
