Papa Françesku njoftoi pjesëmarrjen e Vatikanit në një mision paqeruajtës, qëllimi i të cilit është të ndihmojë në përfundimin e konfliktit rreth Ukrainës.
“Tashmë po punohet në kuadër të misionit, por detajet ende nuk janë bërë publike”, tha Papa, duke theksuar se ai vetë do të japë detaje në kohën e duhur. Në të njëjtën kohë, ai vuri në dukje se ishte i gatshëm të ndihmonte në riatdhesimin e fëmijëve ukrainas të çuar në Rusi ose në territoret e okupuara.
Françesku u tha gazetarëve për misionin për të arritur paqen, duke u kthyer me aeroplan nga Hungaria, ku kishte qenë në një vizitë tre-ditore. “Unë mendoj se paqja arrihet gjithmonë duke hapur kanale komunikimi. Nuk mund të arrish kurrë paqen nëse ato mbyllen. Nuk është e lehtë,” citon Reuters papën .
Kreu i Kishës Katolike Romake tha se foli për situatën në Ukrainë me kryeministrin hungarez Viktor Orban, si dhe me Mitropolitin Hilarion të Budapestit dhe Hungarisë. RBC vëren se Hilarion më parë drejtoi departamentin e marrëdhënieve me jashtë të Kishës Ortodokse Ruse.
Që kur Rusia pushtoi Ukrainën në shkurt të vitit të kaluar, Françesku ka bërë thirrje për paqe pothuajse çdo javë dhe ka shprehur vazhdimisht dëshirën e tij për të ndërmjetësuar midis Kievit dhe Moskës, por propozimet e tij deri më tani nuk kanë çuar në ndonjë rezultat.
Papa 86-vjeçar ka thënë gjithashtu më parë se dëshiron të vizitojë kryeqytetin ukrainas, si dhe Moskën, në një mision paqeruajtës.
