BE ka përfshirë shtatë kompani nga Kina në paketën e njëmbëdhjetë të sanksioneve kundër Rusisë, e cila do të shqyrtohet këtë javë.
Siç shkruan Financial Times duke iu referuar draft dokumentit, kompanitë kineze dyshohen se i shesin Rusisë komponentë që mund të përdoren për të krijuar armë.
Lista paraprake përfshin dy firma nga Kina kontinentale – 3HC Semiconductors dhe King-Pai Technology. 3HC akuzohet për “përpjekje për të anashkaluar kontrollet e eksportit dhe blerje ose përpjekje për të blerë mallra me origjinë amerikane në mbështetje të bazës industriale ushtarake dhe/ose të mbrojtjes të Rusisë”. Nga ana tjetër, King-Pai furnizon Rusinë me mikroelektronikë që “kanë aplikime mbrojtëse, duke përfshirë sistemet e drejtimit të raketave lundruese”, thuhet në dokument.
Gjithashtu në listë janë pesë firma nga Hong Kongu – Sinno Electronics, Sigma Technology, Asia Pacific Links, Tordan Industry dhe Alpha Trading Investments. Të gjitha këto kompani janë të angazhuara në zhvillimin e gjysmëpërçuesve, mikroçipëve dhe elektronikës. Megjithatë, disa prej tyre tashmë janë nën sanksionet e SHBA. Për më tepër, dy kompani nga Emiratet e Bashkuara Arabe, një nga Armenia dhe kompanitë iraniane të përfshira në prodhimin dhe furnizimin e dronëve në Rusi mund të bien nën kufizimet.
Drafti i sanksioneve thotë se komponentët elektronikë luajnë një rol kyç mbështetës “për përdorim nga kompleksi ushtarak-industrial rus” në kryerjen e armiqësive në Ukrainë.
Brukseli deri më tani i ka shmangur sanksionet kundër Kinës sepse nuk ka parë prova që Pekini po furnizon drejtpërdrejt me armë Moskën. Masat kufizuese kërkojnë miratimin unanim të 27 shteteve anëtare përpara se të hyjnë në fuqi.
Një veprim i tillë nga BE-ja mund të shkaktojë pakënaqësi në Pekin, i cili kërkon të pengojë Brukselin të marrë anën e Uashingtonit në luftën e tyre për ndikim global, vëren FT.
Një tjetër synim i paketës së re të kufizimeve do të jetë mbyllja e mundësive për anashkalimin e sanksioneve anti-ruse. Në veçanti, BE-ja synon të ndalojë shitjen e mallrave të caktuara për vendet që do të vazhdojnë të angazhohen në anashkalimin e kufizimeve tregtare. U propozua gjithashtu zgjerimi i listës së mallrave të ndaluara për import në Rusi.
