Ish deputeti dhe gjuhëtari Adem Salihaj në një postim nëe rrjetin social facebook, tha se ndër dokumentet e para të gjuhës shqipe paraja te shqiptarët quhej Denarye, raporton Kosovatimes.
Ai tha se fjalorthi i Arnold Ritter von Harffit është njëri ndër dokumentet e para të gjuhës shqipe.
“Fjalorthi ishte shkruar nga Arnold Ritter von Harffi, një kalorës udhëtar gjerman, i cili në vitin 1496 qëndroi në portin e Durrësit, si dhe në disa vende tjera shqiptare, me ç`rast transkriptoi disa fjalë të gjuhës shqipe të dëgjuara nga vendasit, duke shkruar përbri tyre, përkthimin në gjuhën gjermane. Dokumenti përfshin 26 fjalë shqipe, 8 shprehje dhe numrat nga 1 deri në 10, dhe gjithashtu 100 dhe 1000. Ndër fjalët tjera, von Harfi shkruan edhe si quhej paraja te shqiptarët e asaj kohe. Këtu gjejmë një shprehje interesante, e cila është në përdorim edhe sot, por te dy popuj tjerë. Fjala është për denarin apo dinarin, që përdorej në atë kohë te shqiptarët dhe kishte kuptimin e parasë apo të monedhës dhe përdorej në formën denarye dmth denarje. Për shembull, një denarje, dhjetë denarje, etj. Kjo shprehje sot përdoret te serbët, pra dinari, si dhe te maqedonasit sllavë si denari. Do të ishte interesant po të studjohej nga gjuhëtarët dhe historianët se a e përdornin serbët këtë fjalë në mesjetë për ta shprehur monedhën, apo serbët, si shumë gjëra tjera gjatë historisë, e kanë marrë edhe këtë nga shqiptarët? Për maqedonasit sllavë nuk mund të flitet fare, sepse ata nuk kanë ekzistuar fare si popull deri para 80 vjetësh”, shkruan ai. /Kosovatimes/
