Komisioneri Evropian për Zgjerim, Oliver Varhelji, tha se Serbia duhet të përafrohet me qëndrimin e BE-së ndaj Rusisë në mënyrë që të vazhdojë në rrugën evropiane.
Varhelji shprehu keqardhjen në emër të Komisionit Evropian për ngjarjet e fundit tragjike në Serbi dhe shtoi se është në interes të Beogradit të vazhdojë bashkëpunimin e vazhdueshëm me BE-në.
Ai tha se KE vlerësoi se Serbia i plotësoi kriteret për klasterin e tretë dhe se negociatat do të vazhdojnë.
“Negociatat do të vazhdojnë, veçanërisht në fushën e sundimit të ligjit dhe ne mirëpresim vendimin e Qeverisë së Serbisë për të ruajtur rrugën e anëtarësimit në BE, si dhe miratimin nga ana e Serbisë të të gjitha amendamenteve, që janë hapa të rëndësishëm”, tha Varhelji.
“Komisioni vazhdon të ndihmojë Serbinë në zbatimin e planit të investimeve ekonomike për Ballkanin Perëndimor dhe i bëjmë thirrje Serbisë që të japë një përgjigje të përgjithshme strategjike për gjithçka që kërkon BE-ja në interes të qytetarëve të saj”. BE-ja mbetet partneri, investitori dhe donatori kryesor politik dhe financiar i Serbisë”, përfundoi Varhelji.
Sa i përket ndikimit të vendeve të treta në Serbi, Varhelji si shembull pozitiv e vuri në dukje, siç tha ai, modernizimin e hekurudhës Beograd-Nish-Shkup, të cilën Serbia po e ndërton me BE-në, sepse e refuzoi ofertën e Kinës.
