Xhudistja jonë Distria Krasniqi ka arritur të kapë pozitën e parë në renditjen botërore të kategorisë së deri në 52 kilogramë.
Ajo deri tash ishte e dyta në renditje pas Chelsie Giles nga Britania e Madhe, por në renditjen e re të publikuar nga Federata Ndërkombëtare e Xhudos, ajo mban pozitën e parë, me 7275 pikë, ndërsa Giles është e dyta me 7010 pikë.
Kjo arritje për Distria Krasniqin vjen pasi në Botëror ajo u rendit e pesta, duke fituar 720 pikë të reja në renditjen botërore.
Distria në “Tokyo 2020” fitoi medaljen e artë olimpike, derisa të njëjtin sukses synon ta përsërisë edhe në Olimpiadën “Parisi 2024”.
Në renditjen e re, Nora Gjakova është ngjitur për dy pozita dhe tani renditet e gjashta në kategorinë deri 57 kg, ndërsa Laura Fazliu ka rënë për dy pozita dhe renditet e 13-ta në kategorinë deri 63 kilogramë. Një pozitë më poshtë ka rënë edhe Loriana Kuka dhe tani është e 23-ta në kategorinë deri 73 kilogramë.
Një progres të madh në renditje e ka bërë Erza Muminoviq, e cila është ngjitur për dhjetë vende dhe tani renditet e 68-ta në kategorinë deri 52 kg. Te meshkujt, Akil Gjakova është i 50-ti në kategorinë deri 73 kg. Renditja botërore e xhudos shërben për të siguruar normën olimpike dhe gjithashtu për të përcaktuar pjesëmarrësit në garat e ardhshme.
Do theksuar se në Kampionatin Botëror të mbajtur javën e kaluar në Doha të Katarit, xhudistët tanë nuk arritën t’i gëzohen medaljeve.
