Ish-presidenti i Serbisë, Slobodan Millosheviç, së shpejti do të ketë një monument në Moskë në Sheshin e Evropës, i cili ndodhet në qendër të gjerë të kryeqytetit rus, raportojnë këto ditë mediat ruse. Monumenti dy metra i lartë është punuar nga skulptori serb Dragan Radenoviq, i cili njihet dhe vlerësohet edhe në Rusi, sepse është anëtar i Akademisë Ruse të Arteve.
Anëtarët e shoqatës “Sloboda”, admirues të presidentit të ndjerë, nuk arritën të vendosin skulpturën e Millosheviçit në Beograd, kështu që miqtë e tyre rusë e pranuan idenë. Profesori i shquar i Moskës Dr. Marat Bashirov tha se Sllobodan Millosheviqi kohë më parë parashikoi dhe tha atë që Perëndimi synon t’i bëjë “pjesës tjetër të botës”, dhe kjo mund të shihet në shembullin e Ukrainës.
Bashirov u tha gazetarëve rusë se monumenti i Millosheviçit mund të vendoset pikërisht në sheshin afër stacionit hekurudhor të Kievit në Moskë, ku trenat për në Beograd kanë ardhur e shkojnë për dekada.
Udhëheqësi i motoçiklistëve rusë “Ujqërit e natës” dhe një mik i ngushtë i Vladimir Putinit, Alexander Zaldastanov, i njohur më mirë si Kirurgu, tha se ata janë të gatshëm të ndihmojnë në transportimin e skulpturës së Millosheviqit në Moskë dhe instalimin e saj. “Ne do të bëjmë gjithçka që është e nevojshme për ta transportuar monumentin dhe për ta vendosur atë në Moskë, sepse Millosheviç ishte një hero që dha jetën për Serbinë,” tha Zaldastanov.
— ScepanCar (@ScepanCar) May 14, 2023
Mediat ruse shkruajnë se dy vite më parë kishte iniciativa për ngritjen e monumentit të Millosheviqit në Beograd, por kjo ide nuk u realizua. Ndryshe, fjalën e fundit për vendin ku do të vendoset monumenti do ta kenë autoritetet në kryeqytetin rus. Nëse vërtet vendoset në Sheshin e Evropës, do të jetë një mirënjohje e madhe për presidentin e ndjerë serb. Megjithatë, Ambasada e Serbisë në Moskë nuk ka informacione për vendosjen e monumentit.
Faqja ruse “Carigrad” ka publikuar një fotografi të skulpturës së Millosheviqit, e cila sipas idesë së skulptorit Dragan Radenoviq mban një maskë në dorë, bazuar në fytyrën nga piktura e Edvard Munch “The Scream”. Teksti në këtë faqe interneti thotë se mbrojtja e Sllobodan Millosheviqit ishte një paralajmërim për rusët, bjellorusët dhe ukrainasit për dyfytyrësinë e Perëndimit. Theksohet se monumenti i Millosheviqit në Moskë do të ishte i pari i këtij lloji, sepse ai nuk ekziston as në vendin ku ai ka lindur dhe ku ka qenë president. Kujtohet se gjyqi në Hagë nuk përfundoi sepse Millosheviq vdiq në qeli para përfundimit të tij .
