Presidenti i Turqisë, Recep Tayyip Erdogan, ka siguruar mbështetjen e ultra-nacionalistit që doli i treti në rundin e parë të zgjedhjeve presidenciale turke.
Sinan Ogan mori 5.2 për qind të votave në rundin e parë të zgjedhjeve që u mbajtën më 14 maj dhe pamundësoi që Erdogan të shënonte fitore që në rundin e parë.
Kjo ishte hera e parë në 20 vjet sa është në pushtet që Erdogan nuk fitoi zgjedhjet në rundin e parë dhe ai do të përballet në balotazh me Kemal Kilicdaroglun, kandidatin presidencial të gjashtë partive opozitare.
Ogan u takua me liderin turk të premten dhe mbajti negociata të ndara me aleatët e liderit opozitar, Kemal Kilicdaroglu.
“Ne do të mbështesim kandidatin e Aleancës së Popullit, Recep Tayyip Erdogan, gjatë rundit të dytë të zgjedhjeve që mbahet më 28 maj”, tha ai gjatë një fjalimi televiziv.
Ogan e ka portretizuar veten si mbështetës të nacionalizimit turk të përkrahur nga themeluesi i Turqisë moderne, Kemal Ataturk.
Ai ka kërkuar dëbimin e menjëhershëm të miliona migrantëve dhe ka kërkuar që shteti të ketë një qëndrim më të ashpër ndaj “terroristëve” – referencë për grupet kurde që luftojnë për autonomi në juglindje të Turqisë.
Pavarësisht mbështetjes së ofruar për Erdoganin, analistët kanë ngritur pikëpyetje nëse votuesit e tij do të votojnë për Erdoganin.
Megjithatë, mbështetja e Oganit për Erdoganin minon përpjekjet e Kilicdaroglut për të marrë sa më shumë vota në mesin e nacionalistëve për rundin e dytë të zgjedhjeve.
