Në konferencën e përbashkët të ministres së Jashtme, Donika Gërvalla, me homologun e saj nga Maqedonia Veriore, Bujar Osmani, Gërvalla deklaroi se biseduan për zhvillimet në Kosovë dhe zhvillimet në Evropë e në botë.
“Biseduam për rolin e OSBE-së që luan sot në zhvillimet ë përgjithshme të kontinentit tonë, dhe gjithashtu për rolin që OSBE-ja ka luajtur në Kosovë gjatë të kaluarës por edhe sot”, tha Gërvalla.
Ajo falënderoi ministrin Osmani për të gjithë kontributin që OSBE-ja ka dhënë në të kaluarën.
Gërvalla vuri në pah punën e admirueshme që OSBE-ja bën sot në adresimin e temave të ndryshme të cilat ndihmojnë për një Kosovë më demokratike.
Ministrja Gërvalla tha se Ballkani Perëndimor nuk ka nevojë të jetë një rajon konflikti, por bashkëpunimi dhe i fqinjësisë së mirë.
Ajo sqaroi se ka diskutuar për thellimin e bashkëpunimit ndërmjet Kosovës dhe Maqedonisë së Veriut në shumë fusha. “U pajtuam që të thellohet ky bashkëpunim edhe më tej”, tha Gërvalla.
Ajo ka treguar se me Osmanin kanë diskutuar edhe për implementimin e marrëveshjeve që janë arritur në kuadër të Procesit të Berlinit.
“Biseduam për implementimin e marrëveshjeve në kuadër të Procesit të Berlinit për shkak se Maqedonia e Veriut merret me mbikëqyrjen e implementimit”.
Ministrja Gërvalla deklaroi në këtë konferencë për media se bashkë me homologun nga Shkupi, kanë konstatuar se Kosova bashkë me Shqipërinë dhe Maqedoninë e Veriut, i kanë ratifikuar marrëveshjet dhe po merrem me implementimin e tyre.
Kurse ministri i Punëve të Jashtme të Maqedonisë Veriore , Bujar Osmani, tha se Maqedonia e Veriut dhe Kosova kanë marrëdhënie të shkëlqyeshme, dhe u dakorduan që duhet të vazhdojnë me dialogun pozitiv dhe bilateral.
Osmani shtoi se janë dakorduar për investime dhe fqinjësi të mirë.
Ministri Osmani tha se është me rëndësi të ulen tensionet në veri të Kosovës dhe t’i jepet hapësirë dialogut të ndërmjetësuar nga Bashkimi Evropian.
“Ne mbështesim fuqimisht dialogun e lehtësuar nga Bashkimi Evropian”, tha ministri Osmani.
“Siç e kam theksuar edhe në Beograd, është kruciale për ne që ta kalojmë faqen dhe ta shohim të ardhmen së bashku”.
Sipas tij, sa më shumë që maksimizohet dialogu, aq më shumë minimizohet konflikti dhe mosmarrëveshjet.
“Dialogu gjithmonë është dëshmuar të jetë i frytshëm dhe në Maqedoninë e Veriut na ka ofruar një mundësi të mirë për të ecur përpara”, duke shprehur kënaqësinë që shteti që përfaqëson, ishte nikoqire e dialogut të nivelit të lartë ndërmjet Kosovës dhe Serbisë më 18 mars.
…
Ministrja e Punëve të Jashtme dhe Diasporës, Donika Gërvalla-Schwarz, ka pritur në takim ministrin e Punëve të Jashtme tè Maqedonisë së Veriut, Bujar Osmani.
Në hyrje të MPJ-së ata kanë realizuar fotografi derisa pas takimit të dy homologët pritet të mbajnë konferencë për medie.
Ministri nga Maqedonia e Veriut, Bujar Osmani në ora 10:25 pritet të takohet me presidenten Vjosa Osmani e më pas në ora 11:20 ai do të takohet edhe me kryeministrin e vendit, Albin Kurti.
