Shkëmbim zjarri në kufirin Shqipëri-Kosovë, mes një grupi trafikantësh të qenieve njerëzore dhe policisë. Gazetarja Klodiana Lala raporton për BalkanWeb se nga shkëmbimi i zjarrit nuk ka të lënduar.
Ndërkohë, janë arrestuar 6 shtetas siriane të cilët dyshohen se merreshin me trafik qeniesh njerëzor, ndërkohë që një person ka arritur që të arratiset. Mes të tjerash raportohet se sirianet kanë qenë të pajisur me pistoleta, ndërsa raportohet se policia ka qëlluar me armë në ajër.
Policia e Shqipërisë njofton se pas disa orësh ndjekje, duke koordinuar veprimet me Policinë Kufitare të Kosovës, u bë e mundur kapja dhe arrestimi i 6 prej tyre, si dhe shpallja në kërkim e një shtetasi tjetër.
Vijon kontrolli i zonës për gjetjen e armëve të zjarrit të përdorura në këtë rast, si dhe për kapjen e shtetasit të shpallur në kërkim.
“Menjëherë është komunikuar me Policinë Kufitare të Kosovës, me qëllim bllokimin e kufirit në anën e Kosovës, dhe pas disa orësh ndjekje, shërbimet e Policisë kanë bërë të mundur kapjen dhe prangosjen e 6 prej tyre”.
Ata janë Ayoub Bahhoo, 27 vjeç, Muhaned Nasir, 25 vjeç, Nagid Alabdahah,20 vjeç, Muhamed Shehab,21 vjeç, Mohamed Radawin, 20 vjeç dhe Rabii Lqadi, 40 vjeç, si dhe u shpall në kërkim shtetasi Sultan Grimashi, 27 vjeç.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Kukës, për veprime të mëtejshme.
