Organizata për Siguri dhe Bashkëpunim në Evropë (OSBE) përballet me një krizë brenda gjashtë muajve të ardhshëm. Kjo situatë është krijuar për shkak të mosgatishmërisë së Moskës dhe Minskut për të miratuar presidencën e Estonisë në vitin 2024. Kështu deklaroi ministri i Jashtëm finlandez Pekka Haavisto, transmeton Yle.
Ministri shprehu gjithashtu shqetësimin se OSBE-ja mund të shpërbëhet përpara radhës së Finlandës për të marrë kryesimin në vitin 2025.
“Nëse nuk ka kryetar në 2024 dhe nuk ka konsensus për këtë çështje, atëherë viti i ardhshëm do të jetë viti i shkatërrimit të OSBE-së si organizatë”, theksoi Haavisto .
Sipas rregullave të OSBE-së, kryetari i rradhës duhet të miratohet nga të 57 shtetet anëtare të organizatës. Moska dhe Minsku nuk e kanë miratuar kandidaturën e Estonisë për presidencën e vitit të ardhshëm dhe Talini nuk është gati të heqë dorë nga kandidatura e tij.
Nëntorin e kaluar, Ukraina njoftoi se do të bojkotonte mbledhjet e Asamblesë Parlamentare të OSBE-së derisa Rusia të përjashtohej nga ajo. Deklarata e Kievit erdhi mes raporteve se Polonia nuk kishte lëshuar vizë për delegacionin rus për të marrë pjesë në seancën e asamblesë. Moska u përgjigj duke thënë se organizata kishte frikë nga fjalimet e pakëndshme gjatë diskutimeve.
Në janar, Sekretarja e Përgjithshme e OSBE-së, Helga Schmid, vuri në dukje se Rusia duhet të mbetet në radhët e organizatës për të ruajtur kanalet e negociatave.
