Presidenti i Republikës së Serbisë, Aleksandar Vuçiq, ka biseduar sot në telefon me Presidentin e Republikës së Turqisë, Rexhep Tajip Erdogan, dhe e uroi atë për fitoren e tij zgjedhore, duke i uruar që në këtë mandat të udhëheqë me sukses vendin drejt zhvillimit, njoftoi zyra e presidentit.
“Presidenti Erdogan u interesua për situatën aktuale në Kosovë dhe presidenti Vuçiq e informoi për kronologjinë e ngjarjeve që çuan në përshkallëzimin e dhunës kundër komunitetit serb atje. Ai gjithashtu kërkoi nga kreu i shtetit turk që të përdorë reputacionin dhe ndikimin e vendit të tij për të ruajtur paqen dhe stabilitetin në rajon”, thuhet në deklaratë.
Bëhet e ditur se Vuçiq ka thënë se shpreson që, përveç projekteve ekzistuese, të punojnë së bashku në sipërmarrje të reja, të cilat do të përshpejtojnë zhvillimin e fuqishëm të të gjithë rajonit, do të bashkojnë njerëzit dhe do të lidhin ekonomitë.
Vuçiq e ftoi Erdoganin të vizitojë Serbinë.
