Kryetari i Komunës, Shpejtim Bulliqi, së bashku me nënkryetaren, Marigona Lahu, drejtorin e Kulturës, Pajtim Balaj, drejtorin e Arsimit, Avni Fetahu, mësimdhënës dhe nxënës kanë përuruar bibliotekën e re të qytetit në ditën ndërkombëtare të fëmijëve.
Biblioteka e re përbëhet nga katër kënde të ndryshme të furnizuara me libra, këndi i parë i dedikohet gjuhëve të huaja, këndi i dytë i dedikohet rilindjes kombëtare dhe historisë kombëtare, këndi i tretë është hapësirë e cila i dedikohet për lexim fëmijëve dhe këndi i katërt është salla kryesore e leximit për të rritur. Po ashtu në kuadër të saj është edhe salla kryesore për lexim me kapacitet mbi 50 lexues.
Kryetari Bulliqi tha se një hapësirë e tillë moderne ka qenë e nevojshme kaherë për të gjithë lexuesit e bibliotekës, duke i uruar lexuesve veçanërisht studentëve e nxënësve hapësirat e reja të bibliotekës u zotua se gjithmonë do të jetë i gatshëm të përkrah projekte të cilat janë në të mirë të qytetarëve të komunës.
Gjatë vizitës në hapësirat e bibliotekës kryetari Bulliqi shfrytëzoi rastin që në këndin e leximit të fëmijëve t’ju lexojë një përrallë fëmijëve të pranishëm për festën e tyre. /Kosovatimes/
