Ministri i Mbrojtjes Millosh Vuçeviq tha se situata e sigurisë në veri të Kosovës është ende e rrezikuar për shkak të “vendimeve të njëanshme, të paligjshme dhe jolegjitime të administratës në Prishtinë”.
“Dhe le ta quajmë me emrin e vërtetë – është pushtim nga administrata shqiptare në Prishtinë”, ka thënë Vuçeviq, i cili është edhe kryetar i Partisë Progresive Serbe, për gazetën Politika.
Ai tha se Beogradi “qëndron pas faktit se është gjithmonë më mirë të kërkosh një zgjidhje me mjete politike sesa të hysh në konflikt”.
“Do të shohim se si do të reagojë Prishtina ndaj sanksioneve të shpallura nga Uashingtoni”, shtoi ai.
Sipas fjalëve të tij, ushtria serbe mbetet në nivelin më të lartë të gatishmërisë luftarake dhe “është e gatshme të kryejë çdo urdhër dhe detyrë që merr nga komandanti suprem dhe presidenti i Serbisë, Aleksandar Vuçiq”.
“Nuk do të lejojmë që të kalohet vija e kuqe, që do të thotë të qëlloni mbi njerëzit tanë, mbi fëmijët, t’u konfiskoni pasurinë dhe t’i dëboni nga shtëpitë e tyre. “Ne po luftojmë politikisht dhe diplomatikisht dhe apelojmë që të gjithë të vijnë në vete dhe të ndikojnë që Kurti të vijë në mendje”, ka theksuar Vuçeviq.
