Autoritetet në Ekuador kanë nisur një hetim në Spitalin Martin Icaz në Babaoyo pasi një grua e moshuar e cila u deklarua e vdekur nga mjekët filloi të marrë frymë ndërsa përgatitej për funeralin e saj.
Sipas The Guardian, duke cituar Ministrinë e Shëndetësisë së Ekuadorit, 76-vjeçarja Bella Montoya u shtrua në spital më 9 qershor me një goditje të dyshuar dhe arrest kardiak . Mjekët u përpoqën ta ndihmonin gruan, por ajo nuk iu përgjigj reanimacionit. Për pasojë, mjeku kujdestar ka konstatuar vdekjen e saj.
Në të njëjtën ditë, familja e mori trupin e gruas në shtëpinë e varrimit. “Ishim 20 veta atje,” tha djali i saj Gilberto Barbera për Associated Press. “Rreth pesë orë më vonë, u dëgjuan tinguj nga arkivoli. Kur u afruam, pamë se ajo po merrte frymë rëndë.
“Ajo po luftonte për të marrë frymë,” u tha djali i gruas gazetarëve nga El Universo.
Bella Montoya u transportua më pas në të njëjtin spital ku më parë ishte shpallur e vdekur. Ajo u vendos në repartin e kujdesit intensiv. Ajo aktualisht është nën mbikëqyrjen mjekësore.
“Mamaja ime është me oksigjen dhe zemra e saj është e qëndrueshme. Mjeku i shtrëngoi krahun dhe ajo reagoi. Më thonë se është mirë sepse do të thotë se ajo reagon pak nga pak”, tha Barbera.
Ministria e Shëndetësisë e Ekuadorit ka krijuar një komitet të posaçëm për të hetuar incidentin. Familjarët e Bella Montoya do të bëjnë një denoncim për shkelje mjekësore në prokurori.
