Një ushtar rus u vra sot dhe disa të tjerë u plagosën në provincën Aleppo në Sirinë veriore, kur kolona e tyre u godit nga një predhë e lëshuar nga forcat turke, njoftoi Observatori Sirian për të Drejtat e Njeriut me qendër në Mbretërinë e Bashkuar.Një burim i Reuters nga forcat kurde të sigurisë tha se sulmi është kryer nga territori ku janë dislokuar trupat turke dhe se të plagosurit janë trajtuar në zonën e Afrinit nën kontrollin e forcave të mbështetura nga Turqia.
Një zyrtar i Ministrisë së Mbrojtjes së Turqisë deklaroi në një raport të përditshëm se pretendimet për granatimet e automjeteve ruse janë “të pavërteta”.
Ushtria Kombëtare Siriane , fraksioni i opozitës i mbështetur nga Turqia që kontrollon zonën afër ku ndodhi sulmi, nuk iu përgjigj kërkesës së Reuters për koment.
Lufta civile në Siri e ka ndarë vendin në zona komplekse kontrolli, në të cilat faktorët e huaj – Rusia, Irani, Turqia dhe SHBA – kanë ndikim të rëndësishëm.
Në vitin 2015, Turqia rrëzoi një avion luftarak rus pranë kufirit me Sirinë, por Ankaraja dhe Moska që atëherë kanë përmirësuar marrëdhëniet. Të dy vendet kryejnë patrulla të përbashkëta në veri të Sirisë dhe Rusia po përpiqet të ndërmjetësojë mes Ankarasë dhe Damaskut.
