Presidenti i Serbisë, Aleksandar Vuçiq, ka thënë sot se Beogradi nuk do të marrë pjesë më “thelbësisht” në dialogun me Prishtinën, ndërsa do të vendos nëse do të marrë pjesë “teknikisht” në një takim si pjesë e “taktikës” së tij dhe do t’i informojë të gjithë për këtë 24 orë përpara fillimit të takimit.
Sipas tij, mbajtja e kamionëve në kufi është shkelje e të gjitha marrëveshjeve ndërkombëtare.
“Në një moment ata kamionë do të kalojnë. Tani, pas një ose dy muajsh, ata kamionë do të kalojnë. Sigurisht që nuk duhet të them se është shkelje e Ceftës dhe të gjitha marrëveshjeve të mundshme, por çfarë u intereson atyre. Askush nuk u trondit”, ka theksuar presidenti i Serbisë.
Po ashtu, ai ka deklaruar edhe disa kërkesa të tjera që Serbia po i bën për të qetësuar situatën në veri të Kosovës dhe për të vazhduar dialogun.
“Largoni kryetarët e rrejshëm nga komunat që nuk u takojnë në asnjë mënyrë, tërhiqni forcat speciale policore nga ato komuna dhe tërhiqni nga veriu i Kosovës, mos i ngacmoni njerëzit në urën e Bistricës dhe në vende të tjera dhe mos gjuajini më siç po bëni vazhdimisht dhe mos i arrestoni të gjithë serbët e pafajshëm”, i tha ai Prishtinës.
Vetëm kur të plotësohen këto kërkesa, thotë ai, bisedimet do të kenë sërish kuptim.Vuçiq tha gjithashtu se ka biseduar me përfaqësuesit e serbëve dhe se është i sigurt se do të ndërmarrin hapa aktivë në periudhën e ardhshme, ndërsa Vidovdanin e sheh si datë të rëndësishme.
“Vidovdan është një ditë e rëndësishme në historinë serbe. Në Vidovdan shihet çdo gjë, siç thotë populli ynë, kurse në Vidovdan serbët, jam shumë i bindur, që në mënyrë paqësore do t’i hedhin hapat në rrugën e lirisë së tyre, në përputhje me normat juridike ndërkombëtare. Dhe për sa na përket neve, nuk do të informojmë më askënd, përveç asaj që kemi të bëjmë me ngritjen apo uljen e gatishmërisë luftarake, përveç detyrimeve tona ndaj NATO-s dhe të cilat do t’i përmbushim gjithmonë plotësisht në përputhje me Rezolutën 1244”, përfundoi Vuçiq.
