Ministri i Financave, Punës dhe Transfereve, Hekuran Murati, gjatë fundjavës zhvilloi një takim me Ministrin e Investimeve të Mbretërisë së Arabisë Saudite, Z. Khalid Al-Falih, i shoqëruar nga Shefi Ekzekutiv i Fondit Saudit për Zhvillim Z. Sulltan Al-Marshad, dhe Ambasadori i Mbretërisë së Arabisë Saudite në Tiranë, Z. Faisal Ghazi Hifzi.
Gjatë takimit, dy palët shprehën vlerësim të lartë për bashkëpunimin e deritanishëm në mes të Republikës së Kosovës dhe Mbretërisë së Arabisë Saudite.
Ministri Murati theksoi rëndësinë e mbështetjes nga Mbretëria e Arabisë Saudite për përfundimin e rrugës Prishtinë-Mitrovicë, si objektiv i rëndësishëm infrastrukturor që do të kontribuojë në përmirësimin e infrastrukturës rrugore. Tutje, Ministri Murati theksoi edhe rëndësinë e krijimit të linjave të drejtpërdrejta të fluturimeve nga Kosova drejt Mbretërisë së Arabisë Saudite dhe anasjelltas, që do të ndihmonte në zgjerimin e bashkëpunimit në sektorin e turizmit në mes të dy vendeve.
Në fokus të bisedës ishte edhe rëndësia dhe nevoja për investime në sektorin e shëndetësisë në Kosovë, ashtu që të përmirësohet infrastruktura shëndetësore dhe të ngritët kualiteti i shërbimeve shëndetësore për qytetarët.
Nga ana e tij, Ministri Al-Falih bëri të ditur vullnetin e Mbretërisë së Arabisë Saudite për të mbështetur Kosovën me investime në sektorët e lartpërmendur, si dhe sektorë të tjerë të rëndësishëm për zhvillimin e vendit. Ai shprehu përkushtimin e thellë për të forcuar partneritetin ndërmjet dyja vendeve. /Kosovatimes/
