Rusia ndërmori një seri sulmesh në Ukrainë gjatë natës, dhe sipas mediave lokale, qytete në të gjithë vendin janë nën sulm – kryeqyteti Kiev, Zaporozhye në jug dhe Lviv në perëndim.
Administrata ushtarake e Kievit njoftoi se Moska kishte nisur një sulm me dron në orët e para të mëngjesit, duke paralajmëruar banorët të strehohen. Deri më tani nuk ka raportime për viktima.
Më vonë u njoftua se mbrojtja ajrore e qytetit kishte zbuluar dhe shkatërruar rreth njëzet dronë Shahed të prodhuar nga Irani në një “sulm masiv ajror”. Siç u tha, ky është sulmi i dytë me dron në qytet që nga fillimi i muajit.Në Lviv, një pjesë e “infrastrukturës kritike” është goditur dhe djegur, njoftoi administrata ushtarake e qytetit. Nga sulmi nuk pati të lënduar. Më herët, kryebashkiaku Andrij Sadovij raportoi për shpërthime në Lviv dhe zonën përreth. Nuk është e qartë nëse shpërthimet erdhën nga mbrojtja ajrore apo sulmet me raketa.
Sirenat e rrezikut u dëgjuan edhe në Zaporozhye, raportoi Kyiv Independent, duke vënë në dukje se ky qytet jugor ka qenë objektiv i sulmeve të ashpra ruse ditët e fundit.
Situata në qytet “ishte e qëndrueshme pavarësisht natës së shqetësuar dhe të zhurmshme”, tha më vonë në Telegram kreu i këshillit të qytetit, Anatoly Kurtev.
“Nuk ka të lënduar dhe asnjë dëmtim të objekteve të banimit, ndërkohë që të gjitha sistemet komunale funksionojnë normalisht”, tha ai.
