Asociacioni i Gazetarëve të Kosovës ka reaguar në lidhje me vendimin e ARBK-së ku sërish ia ka pezulluar certifikatën e biznesit të Klan Kosovës.
AGK-ja tha se e ka pranuar me shqetësim të madh lajmin se në më pak se 24 orë pas vendimit për anulimin e pezullimit të certifikatës së biznesit të Klan Kosovës, ARBK-ja, sot ka marrë vendim për ta anuluar atë vendim.
“AGK-ja, rithekson se vendimi i ri e dëshmon përpjekjen e Qeverisë së Vetëvendosjes të udhëhequr nga Kryeministri Kurti për të goditur mediat në Kosovë, dhe për të kufizuar lirinë e mediave e për t’iu dërguar mesazhe paralajmërimi edhe mediave të tjera në vend. Një veprim i tillë është i papranueshëm dhe joserioz, dhe do të dëmtojë më tutje ambientin medial në Kosovë”, thuhet në reagimin e AGK-së, transmeton Klankosova.tv.
Tutje, AGK-ja ka bërë thirrje që të lejohet kohë dhe të mos ketë presione për plotësimin e dokumentacionit të kërkuar, në pritje të vendimit nga ana e KPM-së. /Kosovatimes/
