Televizioni shtetëror rus, pranë Kremlinit, akuzoi sot kreun e grupit paraushtarak Wagner, Yevgeny Prigozhin se “ka humbur mendjen” pasi ka marrë miliarda para publike.
Agence France-Presse vlerësoi se një qëndrim i tillë ilustron narrativën e re të qeverisë ruse për Wagnerin pas rebelimit të dështuar së fundmi.
“Prigozhin ka humbur mendjen për shkak të shumave të mëdha parash,” tha prezantuesi Dmitry Kiselev gjatë emisionit të tij të rregullt të dielën.Kiselyev tha se Prigozhin ka ndjenjën se gjithçka i lejohet që nga operacionet e Wagner në Siri dhe Afrikë. Ai shtoi se kjo ndjenjë u përforcua nga Prigozhin kur luftëtarët e tij pushtuan qytetet ukrainase Soledar dhe Bakhmut.
“Ai mendoi se mund t’i rezistonte Ministrisë së Mbrojtjes ruse, shtetit dhe vetë presidentit (Vladimir Putin)”, tha gazetari.
Pa dhënë prova, Kiselev tha se Wagner mori 858 miliardë rubla (8.8 miliardë euro) para publike.
Një nga faktorët kryesorë prapa rebelimit të grupit Wagner ishte refuzimi i Ministrisë ruse të Mbrojtjes për të “zgjatur kontratat fitimprurëse” të nënshkruara me grupin e hotelierisë Konkord të Prigozhin, tha gazetari.
Rebelimi i grupit javën e kaluar tronditi autoritetet ruse në mes të luftës në Ukrainë. Mercenarët pushtuan selinë e ushtrisë ruse në Rostov-on-Don për disa orë dhe u nisën për në Moskë.
Rebelimi përfundoi me një marrëveshje për largimin e Prigozhin në Bjellorusi. Nuk janë paralajmëruar dënime ndaj luftëtarëve të grupit, por duket se e ardhmja e biznesit të Prigožin është e pasigurt./Kosovatimes/
