Misioni i NATO-s në Kosovë, KFOR-i, do të zhvillojë një stërvitje rutinë ushtarake në pjesën perëndimore të Kosovës nga nesër deri më 6 korrik.
Sipas njoftimit për media nga KFOR-i, ushtarët dhe automjetet e këtij misioni do të vendosen në komunat e Istogut, Shtërpcës, Mamushës, Deçanit, Gjakovës, Dragashit, Hanit të Elezit dhe Kaçanikut.
Po ashtu sipas njoftimit, aktiviteti stërvitor do të kryhet nga kontingjenti shumëkombësh RC-W i cili do të përmirësojë gatishmërinë dhe përgatitjen e njësive.
“Aktivitetet stërvitore do të përfshijnë lëvizje ditën dhe natën me mjete tokësore dhe me helikopterë mbi komunat e Gjakovës, Shtërpcës dhe Mamushës. KFOR-i kryen ushtrime të tilla rutinë për qëllime provash dhe trajnimi për të ofruar një përgjigje në kohë dhe të sigurt. KFOR-i kërkon të sigurojë ndikim minimal në popullatën civile dhe të kufizojë çdo ndërprerje të aktiviteteve komerciale”, thuhet në njoftimin e KFOR-it.
