Një video e një kamarieri që zhytet në ujë për t’u shërbyer mysafirëve është bërë virale në Greqi dhe rajon, duke shkaktuar një valë kritikash në lidhje me të drejtat e punës në vend. Videoja tregon një kamerier të ri duke mbajtur një tabaka në dorë, pothuajse i detyruar të notojë për t’u shërbyer mysafirëve në një bar plazhi në Agia Marina në ishullin Rodos, raporton Greek Report.
Plazhi Agia Marina është një vendpushim popullor dhe ndodhet në veri-lindje të ishullit grek, rreth 4 km në jug të kryeqytetit të Rodosit.
Praktikë e paautorizuar
Ministri i Punës, Adonis Georgiadis , dënoi lokalin e plazhit që lejoi një praktikë të tillë.“Ngjarja e shfaqur në kamera është e neveritshme. Të gjithë duhet të kuptojmë se epoka e skllavërisë ka mbaruar dhe se punëtorët nuk janë skllevër. Punëtorët janë njerëz me të drejta dhe ne jemi këtu për të siguruar të drejtat e tyre. Çdo biznesmen që e harron këtë do të mbajë pasojat e ligjit pa asnjë mëshirë”, tha Georgiadis.
“Dua të jem i qartë. Dua të kemi turizëm, por me kushtin e respektimit të plotë të të drejtave të punëtorëve”, theksoi Gjeorgjiadi.
Pronari i plazhit ka deklaruar në MEGA TV se ka qenë një “incident i izoluar” që është postuar në rrjetet sociale nga një konkurrent.
Ai shtoi se kamerieri i ri, i cili ka punuar në objektin e tij për pesë vitet e fundit, nuk është ankuar. Ai ka theksuar se për punën e tij merr 3000 euro në muaj.
Reaguan edhe punonjësit
“Kostumi i tij është i papërshkueshëm nga uji, por e di që video është postuar nga një profil fals i një konkurrenti që donte të më dëmtonte dhe të njolloste biznesin tim. Roja Bregdetare kreu një sërë kontrollesh në pronën time dhe nuk gjeti asgjë të paligjshme”, pohoi ai.
“Inspektorët i pyetën punëtorët nëse po i detyroja të dilnin në det dhe ata u thanë se po e bënin për një bakshish më të madh”, shtoi ai.
Punonjësit lëshuan një deklaratë duke mbështetur shefin e tyre dhe duke hedhur poshtë pretendimet për kushtet mesjetare të punës.
“Incidenti i kapur në kamera nuk është përfaqësues. Ne jemi të vetëdijshëm se ka autoritete kompetente që mund të mbrojnë të drejtat tona nëse është e nevojshme. Ne pretendojmë kategorikisht se kushtet tona të punës nuk janë mesjetare”, siç pretendojnë disa”, thuhet në deklaratë./Kosovatimes/
