Kryeministri i Malit të Zi, Dritan Abazoviç, sot në Forumin Ndërkombëtar të Dubrovnikut 2023, ftoi vendet e rajonit në veprime të përbashkëta drejt realizimit të projektit të gazsjellësit Adriatiko-Jonian, i cili mund të mbështetet nga BE-ja.
Abazovic foli edhe për potencialin për një tranzicion të gjelbër në rajon, si dhe synimet për të ndërtuar një terminal për gazin e lëngshëm natyror në Portin e Tivarit si një nga projektet kyçe për sigurimin e zhvillimit të qëndrueshëm.
Abazoviq theksoi se çështja e energjisë çdo ditë e më shumë po bëhet çështje e sigurisë dhe për këtë arsye Mali i Zi është shumë i interesuar të kontribuojë në stabilitetin dhe sigurinë energjetike në bashkëpunim me fqinjët e tij më të afërt, njoftoi Qeveria e Malit të Zi.
Energjia po bëhet tema më e rëndësishme, veçanërisht pas agresionit rus kundër Ukrainës, tha kryeministri malazez, transmeton “Vijesti” i Podgoricës.
Abazovic mori pjesë në Forumin e 16-të të Dubrovnikut me titull “Menaxhimi i Rishpërndarjes Globale”, ku foli në panelin me titull “Rendi botëror jashtë rregullit: Si të stabilizohet politika botërore?”.
Forumi i Dubrovnikut mbahet më 7 dhe 8 korrik.
