Ministri ukrainas i Mbrojtjes Alexey Reznikov përshëndeti sot vendimin e SHBA për të dërguar bomba thërrmuese në Ukrainë dhe premtoi se këto municione nuk do të përdoren në Rusi.
Reznikov shkroi në Twitter se municionet thërrmuese do të ndihmojnë në shpëtimin e jetëve të ushtarëve ukrainas, duke njoftuar se Ukraina do të mbajë të dhëna të rrepta të përdorimit të tyre dhe do të ndajë informacione me partnerët.
Reznikov tha se ushtria nuk do të përdorë municione thërrmuese në zonat urbane, por vetëm për të thyer linjat e mbrojtjes së armikut.
SHBA tha të premten se do të furnizojë Ukrainën me municione thërrmuese të ndaluara gjerësisht për një kundërsulm kundër forcave ruse.
Përdorimi i municioneve thërrmuese është i ndaluar nga më shumë se 100 vende, raportoi Reuters.
Municionet thërrmuese zakonisht lëshojnë një numër të madh bombash më të vogla që mund të shkaktojnë vrasje pa dallim në një zonë të gjerë, dhe mjete të tilla të pashpërthyera kanë qenë një rrezik për dekada.
Sot, Moska kritikoi sërish vendimin e SHBA-së, duke e përshkruar atë si një shembull tjetër “të pabesueshëm” të kursit “anti-rus” të Uashingtonit.
