Trafiku u ndal përkohësisht në urën Kerç (Krime) që lidh Krimenë me kontinentin rus pasi mbrojtja ajrore rrëzoi një raketë lundrimi, sipas zyrtarëve të emëruar nga Rusia. “Trafiku në urën e Krimesë në të dy drejtimet është ndalur përkohësisht,” njoftoi në Telegram Vladimir Rogov, një zyrtar në rajonin e Zaporozhye të emëruar nga Rusia .
Megjithatë, jo shumë kohë pas kësaj, ministri i Transportit i Krimesë, Nikolai Lukashenko tha se trafiku ishte rikthyer. Kreu i rajonit të Krimesë, Sergei Aksyonov, pretendoi se mbrojtja ajrore rrëzoi një raketë lundrimi pranë portës së Kerçit. Ai nuk ka specifikuar se nga është lëshuar raketa dhe as nuk ka dhënë ndonjë detaj shtesë. Sipas Aksyonov, nuk ka të lënduar apo viktima.
Ura 15 km që lidh Krimenë me Rusinë kontinentale u sulmua tetorin e kaluar, një pjesë e urës u shkatërrua duke shkaktuar ndërprerje të mëdha të trafikut. Raketa e raportuar e rrëzuar pranë urës sot vjen disa orë pasi zëvendësministrja ukrainase e Mbrojtjes Hana Maljar pranoi qartë se forcat ukrainase filluan një sulm mbi urën tetorin e kaluar, që ishte një ditë pas ditëlindjes së 70-të të presidentit rus Vladimir Putin.
“273 ditë që kur kemi goditur sulmin e parë në urën e Krimesë për të prishur logjistikën ruse”, shkroi Maljar sot në Telegram. Deri më sot, Ukraina nuk e ka marrë në mënyrë të qartë përgjegjësinë për atë sulm, por në mënyrë delikate, përmes shakave të paqarta, kanë bërë të ditur se sulmi ishte operacioni i tyre.
