Janë vendkalime të pashmangshme për automjetet dhe qytetarët. Por kalimi mbi hekurudha në vazhdimësi është përcjellë me rreziqe e madje edhe me humbje jete. Nga vendkalime mbi hekurudha në shumicën e rasteve ngasësit e veturave po pësojnë më fatalitet.
Në fshatin Videjë të Klinës, para disa ditësh, nga një aksident mes një veture dhe një treni ka humbur jetën një 25-vjeçar.
Ky nuk është rasti i vetëm pasi vendkalimet në hekurudha ndër vite po paraqesin rrezik për ngasësit e automjeteve, por edhe për kalimtarët të cilët nuk kanë alternativë tjetër.
Banorët e fshatit Videjë të Klinës, të cilët duhet të kalojnë përmes hekurudhës, ankohen për mungesë të sinjalistikës teksa thonë se ndihen të rrezikuar gjithnjë.
Nga Policia e Kosovës tregojnë për numrin e aksidenteve tren -automjet përgjatë tre vjetësh:
Në vitin 2020 11 aksidente.
Në vitin 2021 13 aksidente.
Në vitin 2023, periudha janar – qershor, 5 aksidente.
Banorët e fshatit Videj të komunës së Klinës ankohen për mungesë sinjalizimi.
“S’ka sinjalizim, s’ka hiq, nuk është rasti i parë që ka ndodhë, ka ndodhë edhe me herët, këtu i ka gjuajt tre vetë, tre djem të ri, e rrezikshme është shumë”, tha banori, Lekë Marku.
“Për ne është shumë i rrezikshëm kalimi në hekurudhë, për shkak se sinjalizime ka vetëm në tabela e jo në drita apo me diçka rampa apo diçka tjetër. Për ne është shumë rrezik dhe nuk është vdekja e parë që ndodhi tani por po ndodhin shpesh, i lus institucionet përkatëse që të ndërruarin masa, para se të ndodhë keq e më keq”, tha banori, Jozef Mriaj.
Ndërsa nga Infrakos, për RTK, kanë thënë se ka bërë identifikimin e mungesave të sinjalizimit të shenjave vertikale në kryqëzimet hekurudhë-rrugë në të gjitha vendkalimet derisa thanë se dhe në vazhdimësi i informojmë organet kompetente për mungesën e tyre.
“Hekurudhat e Kosovës në tërë rrjetin e saj hekurudhor kanë gjithsej 275 vendkalime legale, ndërsa 28 prej tyre janë vendkalime të mbrojtura. Në këtë rrjet hekurudhor kemi gjithsej 33 vendkalime ilegale ose vendkalime të egra dhe pa pëlqim nga Infrakosi. Ky numër ndryshon sepse kohë pas kohe rrënohen nga njësitë punuese të Infrakos Sh.A, por fatkeqësisht prapë kthehen në qarkullim. Viti 2022 është përmbyllur pa asnjë rast të aksidentit me fatalitet, ndërsa nga janari e deri në korrik të vitit 2023 fatkeqësisht i kemi dy raste me fatalitet”.
Sipas Infrakosit janë dy nënkalime hekurudhore ku probabiliteti i rrezikshmërisë është zero. Ngasësve të automjeteve në vendkalimet në hekurudha u bëhet apel për kujdes të shtuar.
